Jazǵy demalys kezeńinde balalar men jasóspirimderdiń tolyq jumyspen qamtylýyn jáne durys ýaqyt ótkizýin qamtamasyz etý, olardyń qadaǵalaýsyz jáne baqylaýsyz qalýyna jol bermeý maqsatynda qalanyń barlyq orta bilim berý uıymdarynda jumys uıymdastyrylatyn bolady. Bul týraly Óńirlik komýnıkasıalar qyzmetiniń brıfıńinde Almaty qalasy bilim basqarmasy basshysynyń orynbasary Qaırat Jumanov málimdedi, dep habarlaıdy Almaty-akshamy.kz.
Spıker úzdiksiz bilim berý júıesinde jazǵy demalystar balalar men jasóspirimderdi damytý, tárbıeleý jáne saýyqtyrý mańyzdy ról atqaratynyn kelesi oqý jylyna olarǵa tyń serpin beretinin atap ótti.
«Kanıkýl kezinde uıymdastyrylǵan demalys – bul, eń aldymen, olardyń áleýmettik qorǵalýy. Jazǵy demalys kezinde balalardyń jaraqattanýy, quqyq buzýshylyq, jasóspirimderdiń zıandy ádetterge júginý qaýpi artady», - dedi Q. Jumanov.
Ol jaz kezeńinde balalarmen kóshede, joldarda, sýda qaýipsiz júris-turys daǵdylaryn jetildirý, órt qaýipsizdigi qaǵıdalary boıynsha, balalardyń jol-kólik jaraqattanýyn, agressıvtilik pen alańdaýshylyqty boldyrmaý boıynsha, sondaı-aq jazataıym oqıǵalar kezinde dárigerge deıingi alǵashqy kómek kórsetý boıynsha pedagogterdiń jumysy jalǵastyrylatynyn habarlady.
Qalanyń barlyq mektepterinde jazǵy demalys kezinde balalardyń demalysy jáne eńbekpen qamtylýy uıymdastyryrylady. Bul sharalar Qazaqstan Respýblıkasy Balalar jylyna arnalǵan jazǵy demalys ýaqytynda balalardyń demalysyn jáne eńbekpen qamtylýyn uıymdastyrý týraly «Almaty balalarynyń jazy – úlken armanǵa jasalǵan shaǵyn qadam!» tujyrymdamasyna sáıkes júzege asady. Tujyrymdamanyń maqsaty - básekege qabiletti tulǵany damytýdyń shyǵarmashylyq, sporttyq, kóshbasshylyq baǵdarlamalaryn iske asyrý maqsatynda balalardyń jazǵy demalysyn jáne jumyspen qamtylýyn uıymdastyrýdyń biryńǵaı tásilderin ázirleý.
Jazǵy kezeńde almatylyq oqýshylardy jumyspen qamtý birneshe baǵyttar boıynsha uıymdastyrylady.
Birinshi – 26 mamyrdan 17 maýsymǵa deıin 1-8 synyp oqýshylary úshin oqýshylardyń joǵaltqan biliminiń ornyn toltyratyn jazǵy mektep jumys isteıtin bolady. Jazǵy mektepte oqý sabaqtarynan basqa dene shynyqtyrý mınýttary, qozǵalmaly oıyndar, fleshmobtar kózdeledi. Shamamen qamtylatyn oqýshylar sany 30 myńnan astam adamdy quraıdy.
Ekinshi – 7-13 jastaǵy balalarǵa arnalǵan jazǵy mektep janyndaǵy lager eki nusqada: tolyq kúnge tamaqpen jáne tolyq emes kúnge tamaqtanýsyz. Jumys ýaqyty-2022 jylǵy 1 maýsymnan 27 tamyzǵa deıin. 26 myńnan astam bala qamtylady.
Úshinshi – mektepterde sporttyq seksıalar, úıirmeler, stýdıalar, oqyrman klýbtary men mektep kitaphanalary jumys isteıtin bolady. Bilim berý uıymdarynda jazǵy kezeńde barlyǵy 1150 úıirme men seksıa (beıneleý óneri, músindeý, toqý, qoldanbaly óner, sport seksıalary) jumys isteıtin bolady. Qamtý 28 myńnan astam balany quraıdy.
Tórtinshi – Almatyda jazda balalarmen qosa qosymsha bilim berý uıymdary (Oqýshylar saraıy, alty oqýshylar úıi, 44 jeke qosymsha bilim berý uıymdary) jumys isteıtin bolady. Jazǵy demalys kezeńinde balalarǵa arnalǵan qosymsha bilim berý uıymdarynda barlyǵy 1200-ge jýyq úıirmeler men seksıalar qoljetimdi bolady. Qamtý 28 myńnan astam balany quraıdy.
Sonymen qatar, almatylyq oqýshylar kanıkýl kezinde qalalyq jáne qala syrtyndaǵy balalar lagerlerinde demala alady. Balalardyń jazǵy demalysy búdjet qarajaty esebinen de, komersıalyq negizde de uıymdastyrylady. Saýyqtyrý demalysymen birinshi kezekte áleýmettik osal sanattaǵy balalar: kóp balaly, az qamtylǵan otbasylardan shyqqan balalar, erekshe bilim berilýine qajettiligi bar balalar qamtylady. Jalpy, 33 myńnan astam bala qamtylady.
Almaty qalasy bilim basqarmasy basshysy orynbasarynyń aıtýynsha, barlyq bilim berý uıymdaryna usynymdary, nusqaýlyqtary, jadynamalary bar nusqaýlyq-ádistemelik hattar joldandy.