Táýelsizdik kúni megapolıs ákimi Baqytjan Saǵyntaev Medeu Park Hotel qurylysynyń jobasymen tanysty. 2022 jyldyń sońyna qaraı «Medeý» qonaq úıiniń ornyna jańa qonaq úı salý josparlanýda, dep habarlaıdy Almaty-akshamy.kz
«Medeý» muz aıdynynda qonaq úı ınfraqurylymyn qalpyna keltirý jobasy qazaqstandyq jáne sheteldik týrıserdi tartý úshin iske asyrylýda. Qurylys alańyn aralaý barysynda B. Saǵyntaev qonaq úı jobasymen tanysty. Úsh qabatty eki ǵımarattan turatyn keshen 2,1 ga aýmaqta salynady, birinshi qabatta 90 oryndyq qonaq úı jáne 300 oryndyq meıramhana, ekinshi qabatta – apart-otel bolady.
Eki bloktyń qonaqtaryna arnalǵan qonaq úıde 25 metrlik baseın, spa, konferens-zaldar, serýendeýge jáne demalýǵa arnalǵan ashyq demalys orny bolady.
Jańa qonaq úı keshenin jobalaý kezinde barlyq qajettilikter, sonyń ishinde qalyptasqan tabıǵı-sáýlettik ansámbl, qorshaǵan ortany qorǵaý sharalary, demalýshylardyń qajettilikteri eskerildi.
Keshen aýmaǵynda sondaı-aq birneshe qoǵamdyq sanıtarlyq toraptar, shuǵyl medısınalyq kómek kórsetý pýnkti, veloparkovkalar, gadjetterdi qýattaýǵa arnalǵan núkteler jáne beınebaqylaý júıesi qarastyrylǵan.
Ulttyq paralımpıada komıtetimen yntymaqtasyp, ınklúzıvti ortany qamtamasyz etý úshin munda múmkindigi shekteýli adamdardy tasymaldaýǵa arnalǵan oryndar, sondaı-aq kireberister men lıftilerge kedergisiz qoljetkizý qamtamasyz etilgen.
2020 jyly týrızm ındýstrıasy koronavırýstyq pandemıadan zardap shekkenderdiń biri boldy. Degenmen, ishki týrıser sany 422 myń adamdy qurady.
2021 jyldyń ekinshi toqsanynyń qorytyndysy boıynsha, Almatydaǵy týrıserdiń jalpy sany 501,4 myńnan astam adamdy qurady, onyń ishinde sheteldik týrıser – 54,2 myń, ishki týrıser - 447,2 myńnan astam.