Mashına jasaý – tehnologıalyq ilgerileýdiń dińgegi. Bul saladaǵy suranys tek búgin ǵana emes, bolashaqta da arta túspek. Almaty telekomýnıkasıa jáne mashına jasaý kolejinde «2025 jyl - Jumysshy mamandyqtar jylyna» oraı «Mashına jasaý» salasy boıynsha forsaıt-sessıa ótti.
Almaty qalalyq bilim berýdegi jańa tehnologıalardyń ǵylymı-ádistemelik ortalyǵy men Tehnıkalyq jáne kásiptik bilim berý bólimi qoldaý kórsetken is-sharaǵa bilim berý uıymdary men óndiris ókilderi, áleýmettik seriktester men BAQ ókilderi qatysty. Olardyń qatarynda «Kýlager Metrostroı» JSHS ókili Zakırjan Shamýradov, «Mehelektromontaj» JSHS-niń ınjener-mamany Ermek Tursynuly, kolej oqytýshylary men óndiristik oqytý sheberleri boldy.
Forsaıt-sessıanyń basty maqsaty – mashına jasaý tehnologıasy, keń beıindi stanokshy, tokarlyq is jáne metal óńdeý baǵyttaryndaǵy ózgeristerdi talqylaý, jańa quzyrettilikterge saı maman daıyndaý máselelerin pysyqtaý.
Almaty telekomýnıkasıa jáne mashına jasaý kolejiniń dırektory Ardaq Kodjahmetova óz sózinde: «Biz árqashan áleýmettik seriktestermen birlese jumys isteımiz. Qazirgi tańda stýdentterdiń 60%-y dýaldy oqytý júıesi boıynsha bilim alady. Bul – bolashaq mamannyń tájirıbe jınaqtap, tabys tabýǵa múmkindik alýy degen sóz. Birqatar túlekter aı saıyn 300-myń teńgege deıin jalaqy alady», – dedi.
Forsaıt-sessıada «Jańa mamandyqtar men quzyrettilikter Atlasy» negizinde usynylǵan jańa mamandyqtar da nazardan tys qalmady. Kolejdiń oqý isi jónindegi orynbasary Aqbota Mákeeva:
– 2025 jyldy Memleket basshysy Qasym-Jomart Toqaev «Jumysshylar jyly» dep jarıalaýyna baılanysty biz búgin jańa mamandyqtar men quzyrettilikter atlasyna sáıkes mashına jasaý salasy boıynsha forsaıt-sessıa ótkizip otyrmyz.
Forsaıt-sessıanyń basty maqsaty – qazirgi zamanǵy eńbek naryǵyna saı, bolashaqta suranysqa ıe bolatyn jańa mamandyqtardy anyqtap, olardy engizý joldaryn talqylaý. Atap aıtqanda, mashına jasaý salasyna qatysty mamandyqtardy atlastaǵy quzyrettilikter negizinde beıimdeý jáne damytý. Jańa mamandyqty engizý – kúrdeli ári kezeń-kezeńimen júzege asyrylatyn proses. Ol úshin aldymen Tehnıkalyq jáne kásiptik, orta bilimnen keıingi bilimniń mamandyqtary men biliktilikteriniń synyptaýyshyna tolyqtyrýlar engizilip, oqý baǵdarlamasyn ázirleý qajet. Aldaǵy ýaqytta bul baǵytta birlesken jumys jalǵasady», – dep atap ótti.
Mashına jasaý – óndiristiń negizi. Bul saladaǵy mamandardy zaman talabyna saı daıarlaý – tek kolejderdiń emes, búkil qoǵamnyń jaýapkershiligi. Al forsaıt-sessıa – osy baǵyttaǵy naqty qadamdardyń biri. Demek, endigi mindet – usynystardy júzege asyryp, jumys berýshi men bilim berý uıymynyń baılanysyn nyǵaıtý bolmaq.
İs-shara sońynda qatysýshylar kásibı pikirlerin bildirip, óz usynystarymen bólisti.
Ermek IMAMBEKOV, «Mehelektromontaj» JSHS ınjeneri:
– Qazirgi tańda tokar mamandyǵy asa ózekti. Jańa tehnologıalar damyp jatqanymen, tokarlyq stanoktarmen jumys isteı alatyn mamandar qajet. Tehnıka 2–3 jylda buzylýy múmkin, sondyqtan ony jóndeıtin kadrlardy aldyn ala daıyndaýymyz kerek.
Aıtgúl ALIBAEVA, Almaty avtomehanıkalyq koleji dırektorynyń OÓİJ orynbasary:
– Bilim berý barysynda biz AutoCAD, Fusion sıaqty qosymshalarmen oqytamyz. Alaıda óndiriste naqty qandaı baǵdarlamalar qoldanylatyny ártúrli bolýy múmkin. Sol sebepti İT salasynda jańa baǵdarlamalar jasaý jáne olardy mashına jasaý salasyna beıimdeý qajet dep sanaımyz.