Qalamyzda osy kezge deıin Zeınep Ahmetovanyń aýqymdy kezdesýi ótpegenin keshe aıtyp ótkenbiz.
Keshe «Alataý» dástúrli óner teatrynda «Kópten kútken kezdesý» taqyrybynda Baýyrjan Momyshulynyń kelini, «Shýaqty kúnder», «Babalar amanaty», «Kúretamyr» kitaptarynyń avtory, jazýshy, qoǵam qaıratkeri Zeınep Ahmetovamen kezdesý ótti, dep habarlaıdy Almaty-akshamy.kz
«Osyǵan deıin oqý oryndarynda ǵana stýdenttermen júzdeskeni bolmasa, Zeınep apaıymyzdyń qala jurtshylyǵymen kólemdi kezdesý bolǵan joq. Kitaptarynyń da tusaýkeseri ótpegen. Basqalar sıaqty mereıtoılary da toılanbaǵan. Sondyqtan bul kezdesýdi jurttyń kútkeni ras. Bizdiń bastamamyzǵa qoldaý bildirip, teatrdy tegin bergizip, apamyzdyń ıyǵyna shapan japqan qala basshylyǵyndaǵy azamattar – Arman Qyryqbaıulyna, Ǵanı Maılybaevqa, Arman Qalybekovke raqmet aıtamyz», dedi kezdesýge muryndyq bolǵan «Adyrna» UEB qoǵamdyq qorynyń jetekshisi Arman Áýbákir.Almaty qalasy ákimdigi Mádenıet basqarmasy men «Adyrna» ulttyq-etnografıalyq birlestigi qoǵamdyq qory birlesip uıymdastyrǵan sharada Zeınep Ahmetova ulttyq tárbıe, rýhanı qundylyq, salt-dástúr, ene men kelin arasyndaǵy syılastyq, bala tárbıesi týraly óziniń ómirden túıgen tájirıbesinen keńinen áńgimeledi.
Sondaı-aq, qalam men qarýdy qatar ustaǵan batyr baba Baýyrjan Momyshulynyń ómiri, onyń ósıetteri men este qalarlyq qyzyqty oqıǵalarymen bólisti.
«Atamnyń arqasynda búgingi dárejege jetip, el ishinde erkelep júrmin» degen Zeınep apaı barlyq maqtaý-madaq ózine emes, batyr atamyzǵa aıtyldy dep qabyldaıtynyn jetkizdi.
Keshti «Adyrna» ulttyq etnografıalyq birlestiginiń jetekshisi Arman Áýbákir tizgindedi. Shara barysynda dástúrli ánshi Erlan Tóleýtaı án shyrqady.
«Jazýshynyń ulaǵatqa toly ǵıbratty áńgimelerin tyńdaýǵa kelgen qalyń kórermenniń arasynda kompozıtor Qaldybek Qurmanáli, qoǵam qaıratkeri, abaıtanýshy Ádil Nesipbaev, Qazaqstannyń Eńbek sińirgen qaıratkeri Asyly Osman syndy tanymal azamattar boldy. Ústin-ústine suraq qoıyp belsendilik tanytqan kórermen Zeınep apaıdy jibergisi kelmedi, sol sebepti kezdesý 3 saǵattan astam ýaqytqa sozyldy. Kesh sońynda Zeınep Ahmetovaǵa syı-syıapat tabystaldy. Quttyqtaý sózimen ortaǵa shyqqan Almaty qalasy ákimdigi mádenıet basqarmasynyń mádenı kópshilik is-sharalar bóliminiń basshysy Arman Qalybekov Zeınep Ahmetovaǵa qamzol kıgizip, ıyǵyna oramal japty», - dedi «Adyrna» UEB qoǵamdyq qorynyń jetekshisi Arman Áýbákir.