Almaty qalasynda 1539 kardıohırýrgıalyq operasıa jasalyp, oǵan 7,1 mlrd teńge tólengen
Ońtústik astanada 2022 jyly mindetti áleýmettik medısınalyq saqtandyrý esebinen kórsetilgen qyzmetterge 117,3 mlrd teńge jumsaldy. Bul týraly búgingi brıfıńte Medısınalyq saqtandyrý qorynyń Almaty qalalyq fılıaly dırektory Tileýhan Ábildaev habarlady.
Aıtýynsha, jyl saıyn medısınalyq saqtandyrý esebinen kardıohırýrgıa, neırohırýrgıa, ýrologıa, travmatologıa, onkologıa, hırýrgıa jáne taǵy da basqa profılder boıynsha júzdegen operasıa jasalyp jatyr. Osyndaı bir ǵana kúrdeli otanyń quny orta eseppen birneshe mıllıon teńgege jetip jyǵylady.
«Mysaly, 2022 jyly Almaty qalasynda 1539 kardıohırýrgıalyq operasıa jasalyp, oǵan 7,1 mlrd teńge tólengen. Sonymen qatar, 2,7 mlrd teńgege 534 neırohırýrgıalyq ota jasalǵan. Taǵy 2,2 mlrd teńgeni MSQ lor-profıli boıynsha jasalǵan 330 operasıaǵa jumsady», - deıdi Tileýhan Ábildaev.
Búginde artroz, artrıt syndy býyn aýrýlarynyń kóbeıýine baılanysty tize, jambas býyndaryn almastyrýshylar sany kúrt artyp otyr. 2022 jyly almatylyq travmatologtar osyndaı 4 270-ten astam operasıa jasady. Oǵan MSQ 5,6 mlrd teńge tóledi, deıdi fılıal basshysy.
Sonymen qatar jalpy quny 476 mln teńgeden asatyn 64 transplantasıa jasalǵan, onyń ishinde 27 búırek-baýyr almastyrý operasıasy da bar.
«Bir qaraǵanda, munyń bári jaı ǵana sıfr bolyp kórinýi múmkin. Shyn máninde, saqtandyrylǵan azamattardyń qaltasynan shyǵatyn shyǵyn edáýir qysqaryp, olar osynsha qyzmetti tegin paıdalanyp otyr», - dep qorytty Tileýhan Ábildaev.