Stomatologıalyq klınıka kómegine júginý úshin emhanadan joldama alýdyń qajeti joq
2023 jyly Almaty qalasynda mindetti áleýmettik medısınalyq saqtandyrý paketi arqyly kórsetiletin stomatologıalyq qyzmetterge 3,9 mlrd teńge bólindi. Bul týraly búgingi brıfıńte Medısınalyq saqtandyrý qorynyń Almaty fılıaly dırektory Tileýhan Ábildaev habarlady.
Taǵy bir aıta keterligi, Qor 2023 jyldan bastap stomatologıalyq klınıkalarmen tikeleı kelisimshart bekite bastady.
«Buryn stomqyzmet kórsetý týraly kelisimshart emhanalar arqyly jasalatyn. Iaǵnı, stomatologıalyq klınıkalar emhanalarmen sýbmerdigerlik kelisimshart arqyly jumys isteıtin jáne halyqqa kórsetilgen stomqyzmet sanyn emhanalar qadaǵalaıtyn. Emhana jumysynyń kóptiginen bul prosesti baqylaý qıyndyq týdyryp keldi. Saldarynan stomatologıalyq klınıkalar tarapynan kórsetilmegen qyzmetterdi «kórsetti» dep jazý faktileri de kezdesti. Sondyqtan Qor osyndaı olqylyqtardyń aldyn alyp, qyzmet kólemi men sapasyn baqylaý maqsatynda kelisimshartty tikeleı jasaý týraly sheshim qabyldady», - dedi Tileýhan Ábildaev.
Aıtýynsha, stomatologıalyq klınıka kómegine júginý úshin emhanadan joldama alýdyń qajeti joq. Aldymen Qormen jumys isteıtin tis klınıkalaryn naqtylap alý qajet. Olardyń tizimimen MSQ fms.kz resmı saıty arqyly tanysýǵa bolady. 2023 jyly Almatyda 70 medısına uıymy stomatologıalyq qyzmet kórsetedi, olardyń arasynda emhanalar men jeke menshik klınıkalar da bar.
Esterińizge sala ketsek, shuǵyl stomatologıalyq kómek balalar, júkti áıelder, UOS ardagerleri men zeınetkerler, múgedekter, balalyq shaqtan múgedek jáne 1-top múgedegin kútýshiler, «Altyn alqa», «Kúmis alqamen» marapattalǵan kóp balaly analarǵa, ataýly áleýmettik kómek alýshylarǵa, josparly stomkómek 18 jasqa deıingi balalar men júkti áıelderge kórsetiledi.