LED-ekrandaǵy jarnamaǵa salynatyn salyq mólsherlemesin arttyrý Almaty búdjetine túsetin túsimdi jylyna 672 mln teńgege kóbeıtedi, dep habarlaıdy aqshamnews.kz
Almatyda qalalyq máslıhattyń kezekti XXII sesıasy ótip, depýtattar megapolıs aýmaǵynda syrtqy jarnamany ornalastyrǵany úshin aı saıynǵy tólemniń jańa mólsherlemesin bekitti.
Ózgeris LED-ekran túrindegi nysanǵa jarnamany ornalastyrý úshin aı saıynǵy tólemge áser etti. Buryn Salyq kodeksiniń mólsherlemesine sáıkes jarnamany ornalastyrǵany úshin aı saıynǵy tólem – 20 AEK (73 840 teńge) bolsa, endi máslıhat sheshimine sáıkes «A» sanatyna jatatyn kóshelerde ornalasqan nysandar boıynsha aı saıynǵy tólem – 40 AEK (147 680 teńge) bolady.
Qalalyq josparlaý jáne ýrbanıstıka basqarmasynyń basshysy Nurlan Boranbaev aıtqandaı, aı saıynǵy tólemniń bazalyq mólsherlemesiniń ósýi Almatynyń elimizdegi eń iri megapolıs bolýyna jáne ashyq keńistikte ornalastyrylǵan jarnamanyń áleýetti tutynýshylarynyń kóptigine baılanysty.
Sonymen qatar, ol bul nysandar elektr qýatyna, jer ýchaskelerine qosymsha júkteme túsiretinin, sondaı-aq retsiz kórinis týdyratynyn atady, tıisinshe bul shyǵyndar tólem mólsherlemesiniń ósýi arqyly ótelýge tıis.
«Qala aýmaǵynda 825 LED-ekran bar, onyń 728-i «A» sanatyna jatatyn kóshelerde ornalasqan. Bul rette, bir LED-ekranda aı saıyn 10-nan 15-ke deıin jarnama berýshi ónimin ornalastyrylady. Mólsherlemeniń ózgerýi jergilikti búdjetti aıyna 55,9 mln teńgege ulǵaıtýǵa múmkindik beredi», - dedi Nurlan Boranbaev.
Onyń aıtýynsha, qala kásipkerlerine osy ózgeristerdi bıyl aqpan aıynda habarlanǵan. Qaýlynyń tıisti jobasy «Ashyq NQA» saıtynda kópshilik talqylaý úshin jarıalandy.
Buǵan qosa, ótpeli kezeń beriledi, jańa mólsherlemeler osy jyldyń qarasha aıynda kúshine enedi.