Búgin Qazaqstannyń batysynda, soltústik-batysynda, ortalyǵynda, ońtústigi men ońtústik-shyǵysynda kún kúrt buzylady. Sınoptıkter bul óńirlerde qatty jańbyr jaýyp, ózenderdegi sýdyń deńgeıi kúrt kóteriletinin eskertti. Bul týraly Aqshamnews.kz saıty habarlaıdy. «Qazgıdromet» mamandary sý tasqyny qaýpiniń kúsheıýine qardyń erýi men jaýyn-shashynnyń kóp mólsherde túsýi sebep bolyp otyrǵanyn aıtady.
14 oblysta daýyldy eskertý jarıalandy
Meteorologtardyń dereginshe, búgingi kúni eldiń birqatar óńirlerinde aýa raıynyń qolaısyzdyǵyna baılanysty daýyldy eskertý jarıalandy. Bul qatarda Atyraý, Jambyl, Qyzylorda, Mańǵystaý, Batys Qazaqstan, Túrkistan, Soltústik Qazaqstan, Qaraǵandy, Ulytaý, Aqtóbe, Qostanaı, Jetisý jáne Aqmola oblystary bar. Negizgi qaýip faktorlary – tuman, naızaǵaı jáne qatty jańbyr.
Tótenshe jaǵdaılar mınıstrligi men jergilikti ákimdikter turǵyndardy qaýipsizdik sharalaryn qatań saqtaý qajettigin eskertedi. Ásirese, sý tasqyny qaýpi bar eldi mekenderde evakýasıa jospary ázirlenip, bógetter men sý qoımalarynyń jaǵdaıy qatań baqylaýǵa alynǵan.
Astana, Almaty jáne Shymkent qalalaryndaǵy aýa raıy
Astanada búgin kúndiz +17–19 °C, túnde +6–8 °C bolady. Keı ýaqytta jańbyr jaýady. Jeldiń jyldamdyǵy 7–12 m/s shamasynda.
Almatyda aýa temperatýrasy kúndiz +21–23 °C, túnde +11–13 °C shamasynda. Tańerteń jáne kúndiz naızaǵaıly jańbyr jaýady, túnde jaýyn-shashyn bolmaıdy. Jel 5–10 m/s, naızaǵaı kezinde 15–20 m/s deıin kúsheıýi múmkin.
Shymkentte aýa raıy birshama jaılyraq: kúndiz +25–27 °C, túnde +11–13 °C. Jaýyn-shashyn kútilmeıdi. Alaıda jel kúsheıip, 23 m/s deıin jetýi yqtımal.