1-5 qarasha aralyǵynda megapolıste Almaty Creative Week aptalyǵy ótýde, oǵan 30 halyqaralyq uıymnan 130 spıker qatysyp jatyr.
Forýmǵa Nıderlandy, Fransıa, Italıa, Germanıa, Ulybrıtanıa, Qyrǵyzstan, Ózbekstan jáne t.b. elderdiń kreatıvti segmentiniń uıymdary men bilim berý jáne kreatıvti habtar tartylǵan dep habarlaıdy almaty-akshamy.kz
Qala ákiminiń orynbasary Álisher Ábdiqadyrov Almaty Creative Week aptalyǵynyń saltanatty ashylýynda Almatyda kreatıvti ındýstrıany damytýǵa barlyq qajetti resýrs baryn atady. Aıtýynsha, búginde bul sala boıynsha qalada 22 myń kásiporyn jumys isteıdi. 2021 jyldyń qorytyndysyna sáıkes, kreatıvti ındýstrıa salasyndaǵy shaǵyn jáne orta bıznes sýbektileri 5,4 mlrd. teńge salyq tólegen.
«Búgingi forým Almaty qalasy men kreatıvti qoǵamdastyqtyń barlyq ókili úshin ashyq suhbattasý, tájirıbe almasý, kreatıvti ındýstrıanyń sapaly ári údemeli damýyna qajetti jańa bıznes úlgisin anyqtaý múmkindik beredi. Bizdiń damý baǵytymyz sáýlet, dızaın jáne zamanaýı óner, mýzyka, kıno jáne anımasıa, sán jáne qolóner, jańa medıa jáne sıfrlyq mádenıet, kıbersport jáne geım-development salasynda órbıtin bolady», – dedi Álisher Ábdiqadyrov.
Sonymen qatar, ol kreatıvti ındýstrıany tıimdi damytý maqsatynda Almatyda tıisti ınfraqurylym qalyptastyrý, kásipkerlikti yntalandyrý, bul saladaǵy bilimdi, daǵdyny jáne quzyretti keńeıtý boıynsha sharalar qabyldanatynyn aıtty.
Aldaǵy ýaqytta Almatyda 3 kreatıvti hab, IT hab, qalalyq venchýrlyq qor jáne halyqaralyq deńgeıde eki beıne jáne dybys jazý stýdıasyn ashý josparlanyp otyr. 2030 jylǵa qaraı kreatıvti ındýstrıa salasyn keshendi damytý Almatynyń jalpy óńirlik ónimindegi kreatıvti ındýstrıa úlesin 5%-ǵa deıin jetkizip, kreatıvti ındýstrıa eksportynyń qyzmetin 500 mln. AQSH dollaryna deıin arttyryp, ony ekonomıkalyq mańyzdy salaǵa aınaldyrýǵa múmkindik beredi.
Qazaqstan Respýblıkasy Mádenıet jáne sport vıse-mınıstri Erjan Erkinbaevtyń aıtýynsha, qazir kreatıvti ındýstrıamen baılanysty ózgerister men tolyqtyrýlar Kásipkerlik kodeksine jáne «Mádenıet týraly» Zańǵa engizilip jatyr.
Aıta keteıik, 1-5 qarasha aralyǵynda Almatyda kreatıvti ındýstrıa aptalyǵy ótip jatyr. Onyń aıasynda kórmeler, perfomanstar, sheberlik synyptary jáne kóptegen basqa da is-shara uıymdastyrylady. Buǵan qosa, Tımýr Bekmambetovtyń «PROFIL» fılminiń premeralyq kórsetilimi, sonymen birge, Almaty qalasy men Almaty oblysy turǵyndarynyń arasynda Dota 2 túrinde Almaty Creative Week Esports Cup 2022 kıbersport týrnıri ótedi.