İshki ister mınıstrligi «Adam saýdasyna qarsy kúres týraly» zań jobasyn ázirlep jatyr.
Zań deńgeıinde alǵash ret İshki ister mınıstrligi men Eńbek mınıstrligi adam saýdasymen kúresetin ýákiletti organ bolyp bekitilýi múmkin, dep habarlaıdy Almaty-akshamy.kz QazAqparatqa silteme jasap.
«Sonyń negizinde ýákiletti organdardyń fýnksıalary naqty bekitiledi. Qalǵan 12 memlekettik organ men ákimdikterdiń, úkimettik emes uıymdardyń fýnksıasy da naqtylanady», - dedi İshki ister mınıstri Marat Ahmetjanov Astanada ótip jatqan quqyqtyq forýmda.
Onyń málimeti boıynsha, Adam saýdasyna qarsy is-qımyl jónindegi komısıalardyń quqyqtyq mártebesi artpaq.
«Adam saýdasyna qarsy is-qımyl jónindegi vedomstvoaralyq jáne óńirlik komısıalardyń quqyqtyq mártebesi bekitiledi. Olarǵa osy saladaǵy qoǵamdyq qatynastarǵa quqyqtyq yqpal etý quzyreti beriledi. Olardyń Úkimet deńgeıinde usynystary eskeriledi. Bul naqty merzimder, oryndaýshylar jáne jaýapkershilik degen sóz», - dedi vedomstvo basshysy.