Ortalyq Azıaǵa sapary barysynda kreatıvti ekonomıka jónindegi Jahandyq keńestiń (Global Creative Economy Council) sarapshylary qazaqstandyq kreatıvti ındýstrıa ókilderimen birneshe kezdesý ótkizip, strategıalyq sesıalar uıymdastyrdy, dep habarlaıdy aqshamnews.kz
28 qyrkúıekte "Báribaev 36" keńistiginde Brıtan konsýldyǵynyń uıymdastyrýymen jáne Almaty Tourism Bureau qoldaýymen kreatıvti ekonomıka boıynsha konferensıa ótti. 29 qyrkúıekte Markov kóshesi, 44 mekenjaıyndaǵy Almaty Creative kreatıvti habynda hab rezıdentterimen kezdesý uıymdastyryldy.
28 qyrkúıektegi konferensıa memleket, bıznes jáne kreatıvti ındýstrıa ókilderin biriktirip, tájirıbe almasý jáne ósýdiń múmkindikterin izdestirýge baǵyttaldy. 13 elden kelgen 15 halyqaralyq sarapshy óz zertteýlerin usynyp, álemniń túrli aımaqtarynda, sonyń ishinde Afrıka, Azıa jáne Latyn Amerıkasynda kreatıvti ekonomıkany damytýdyń sátti júzege asqan mysaldaryn atap ótti. Kreatıvti ındýstrıadaǵy jańa úrdister men olardy engizýdiń tájirıbelik jaǵyna basa nazar aýdaryldy.
Kingston Creative kompanıasynyń negizin qalaýshy ári atqarýshy dırektory Andrea Dempster Chang kreatıvti klasterlerdi ıntegrasıalaýdyń mádenı týrızmniń damýyna qalaı yqpal etetinin túsindirdi. Ol týrıserdi mádenı jáne shyǵarmashylyq bastamalar arqyly tartýdyń mańyzdylyǵyn atap ótti. Kreatıvti ekonomıka jónindegi Jahandyq keńestiń múshesi, ınovasıalar jónindegi sarapshy Djaıradj Mashrý konferensıada mádenıet pen shyǵarmashylyq salasyn damytýǵa arnalǵan negizgi qadamdardy usyndy.
"Bizdiń Almatyǵa saparymyz shabyt berdi. Bolashaqta jergilikti jáne jahandyq kreatıvti ındýstrıany damytý úshin úlken áleýetti kórip otyrmyz", – dedi Djaıradj Mashrý.
Óz kezeginde Almaty Tourism Bureau basshysy Kamıla Luqpanova Qazaqstanda kreatıvti ındýstrıany damytýdyń mańyzdylyǵyn atap ótip, týrızmdi ilgeriletýdegi jergilikti kreatorlardyń róline toqtaldy. Onyń aıtýynsha, kreatıvti ındýstrıa týrızmniń ajyramas bóligine aınalyp, aımaqtyń ekonomıkalyq turǵydan ósýi men mádenı almasýyna yqpal etýde.
29 qyrkúıekte halyqaralyq sarapshylar Almaty Creative kreatıvti habynyń jumysymen tanysyp, onyń rezıdentterine ózderiniń halyqaralyq tájirıbesin bólisip, kreatıvti ekonomıka salasyndaǵy sońǵy úrdisterdi talqylady. Hab rezıdentteri óz jobalaryn usynyp, ıdeıalar almasyp, sheteldik meımandardyń pikirin bildi.
İs-shara ótkizýdegi negizgi maqsat — halyqaralyq baılanysty nyǵaıtý jáne Almatynyń Ortalyq Azıadaǵy kreatıvti ekonomıkanyń ortalyǵy retindegi mártebesin rastaý.