Bul týraly Almaty Óńirlik komýnıkasıalar qyzmetiniń brıfıńinde qalanyń bas memlekettik sanıtarlyq dárigeri Qarlyǵash Ádbijabbarova málimdedi. Sonymen qatar, ol qala turǵyndaryna vaksınalaý men revaksınalaýdy usynady, dep habarlaıdy Almaty-akshamy.kz
Spıker Almatyda KVI boıynsha epıdemıologıalyq ahýal nasharlaı túskenin, QR boıynsha baǵalaý matrısasynda qala «qyzyl» aımaqtyń ortasynda ornalasqanyn atap ótti.
«Derttiń táýliktik ósimi artty. Qańtar aıynda KVI juqtyrýy: 1-aptada – 1025 jaǵdaı, 2-aptada – 6050, 3-aptada - 13133, 12,8 ese ósti», - dedi qalanyń bas sanıtarlyq dárigeri.
Onyń aıtýynsha, «delta» shtamynyń «omıkron» shtamymen yǵystyrylýyna baılanysty juqtyrýdyń kúrt ósýi baıqaldy. «Omıkron» juqtyrǵan jaǵdaılardyń sany 22 qańtarda táýligine 2,5 myńǵa deıin birtindep ósti. Aıdyń aıaǵynda úsh myńǵa deıin derttiń táýliktik tirkelýi kútilýde.
«Ótken jyldyń naýryz aıynda vaksınalaý bastalǵannan bastap búgingi kúnge deıin vaksınalanǵandardyń tek 2,1%-y koronavırýstyq ınfeksıany juqtyrǵan. Bul fakt qala turǵyndaryna vaksınalaý men revaksınalaý qarqynyn kúsheıtýdi talap etedi. Qalada ımýndyq júıe 62,4% quraıdy», - dedi Qarlyǵash Ádbijabbarova.
Kóbinese 20-39 jas aralyǵyndaǵy naýqastar tirkeledi – 40%, 40-59 jas – 26,7%, 60 jastan asqan adamdar – 19,3%. Aýrý juqtyrý zeınetkerler arasynda – 1,5%-ǵa, mektep jasyna deıingi balalar arasynda – 0,8%-ǵa, bank salasynyń qyzmetkerleri arasynda – 0,2%-ǵa, uıymdar, JSHS, JK arasynda – 0,1%-ǵa óskeni baıqalady.
«Infeksıanyń yqtımal oryndary boıynsha ınfeksıanyń ósýi metroda – 5,5%-ǵa, SOSO-da jáne SÚ-de – 1,3%-ǵa jáne kvartaldar ishindegi azyq-túliktik emes dúkenderde – 0,7%-ǵa baıqalady. Infeksıa avtobýstarda, troleıbýstarda – 8,5%-ǵa, Ashyq-qa qatysýshy obektilerde - 4,5%-ǵa, oramdar ishindegi azyq-túlik dúkenderinde – 2,7%-ǵa tómendedi. Ótken aptada negizgi juqtyrý oryndary saýda obektileri – 37,9%, qoǵamdyq kólik – 24,8%, otbasylardaǵy baılanystar – 18,4% jáne bazarlar – 9,6% bolyp tabylady», - dep habarlady spıker.