Almaty máslıhatynyń depýtaty Ásıa Aqanova qala aýmaǵyn kóriktendirýdiń bekitilgen jańa erejesine pikir bildirdi, dep habarlaıdy almaty-akshamy.kz.
Onyń aıtýynsha, sharalardyń kúsheıýi ýaqyttyń jańa talaptaryna baılanysty.
«Esterińizde bolsa, bıyl kóktemde «Taza Qazaqstan» jalpyqazaqstandyq naýqany aıasynda Memleket basshysynyń bastamasyn oryndaý boıynsha is-sharalar bastaldy. Osy baǵytta qala ákimi Erbolat Dosaevtyń bastamasymen ár aýdandy qamtyǵan «Almaty – bizdiń ortaq úıimiz» naýqany bastaldy. Ony iske asyrýǵa megapolıstiń barlyq turǵyny men qonaǵy atsalysty. Almaty qalasynyń aýmaǵyn kóriktendirýdiń jańa erejesi, meniń oıymsha, ortaq jaýapkershilik qaǵıdatyn zańdastyrýdyń qısyndy qorytyndysy bolyp tabylady. Bul árbir almatylyqtyń jaýapkershiligin jáne qalany tıisti jaǵdaıda kútip ustaýǵa qatysýy kerek degendi bildiredi», - deıdi Ásıa Aqanova.
Máslıhat depýtaty jańa erejege sáıkes mádenı-buqaralyq is-sharalardy uıymdastyrýshylar endi sol oqıǵadan keıin tazalaý jumystaryn júrgizýge mindetti ekenine nazar aýdardy.
«Mádenıet jónindegi beıindi komısıanyń tóraǵasy retinde elimizdiń mádenı injý-marjany bolyp tabylatyn Almatyda kóptegen iri is-shara únemi ótkizilip turatynyn atap ótkim keledi. Endi jańa erejege sáıkes, mundaı is-sharalardy uıymdastyrýshylar buqaralyq is-shara ótetin oryndy tıisti kúıge keltirýi kerek. Bul eki mıllıon halqy bar qala úshin óte mańyzdy, óıtkeni, ókinishke qaraı, bir keremet is-sharadan keıin gúl egilgen jerdiń taptalǵan edi. Jańa ereje osyndaı is-sharalardy ótkizýdi retteıdi», - deıdi ol.
Sondaı-aq, erejede shaǵyn jáne orta kásipkerlik ókilderiniń jaýapkershilik aımaǵyn aıqyndaý jónindegi tarmaq jazylǵan.
«Bıznestiń áleýmettik jaýapkershiligin kúsheıtý úshin kóriktendirý tólqujaty anyqtaldy. Syrtqy kelbetke, ǵımarattardyń qasbetine, pandýstarǵa qoıylatyn jalpy reglamentteý talaptary ázirlendi. Bul bizdiń qalamyzdyń ınklúzıa deńgeıin arttyrýǵa múmkindik beredi», - dep sózin túıindedi Ásıa Aqanova.
Esterińizge sala keteıik, 2024 jyly 19 shildede VIII saılanǵan máslıhattyń kezekten tys HHİ sesıasynda depýtattar Almaty qalasynyń aýmaǵyn kóriktendirýdiń jańa erejesin bekitti. Bul sharalar qaýipsiz, yńǵaıly jáne ekologıalyq qolaıly qalalyq ortany qurýǵa baǵyttalǵan.