Ózge eldegi bul qandastarymyz - bıznes-ımmıgranttar jáne suranysqa ıe mamandar.
Azamattyqtary basqa eldiki bolǵanymen, bul etnıkalyq qazaqtarǵa Qazaqstanda 10 jyl ómir súrýge jáne jumys isteýge quqyq beretin 55 «Ata joly» kartasy berildi, dep habarlaıdy almaty-akshamy.kz.
Eńbek jáne halyqty áleýmettik qorǵaý mınıstrliginiń málimetinshe, jergilikti atqarýshy organdarǵa «Ata joly» kartasyn alýǵa barlyǵy 75 ótinim tústi. 2023 jyly 44 karta: bıznes-ımmıgranttarǵa 20 karta jáne suranysqa ıe mamandarǵa 24 karta berildi. Bıyl 11 karta berildi: bıznesmenderge 5 jáne suranysqa ıe mamandarǵa 6 karta.
«Ata joly» kartasyn alǵandardyń arasynda ınjener-fızık, ınjener-matematık, hımıalyq tehnologtar, jaq-bet hırýrgıasy dárigerleri, pedıatrlar jáne t. b. sıaqty mamandar bar, olar 15 elden keldi: Reseı, Qytaı, Aýǵanstan, Mońǵolıa, AQSH, Avstrıa, Izraıl, Germanıa, Túrkıa, Ózbekstan, Qyrǵyzstan, Nıderland, Fınlándıa, Fransıa jáne Túrikmenstan.
«Ata joly» kartasyn engizýdiń maqsaty tarıhı otanmen baılanysty nyǵaıtý, ulttyq dástúrlerdi saqtaý, Qazaqstanda olardyń áleýetin iske asyrý úshin elge kásipqoılar men tabysty bıznesmenderdi tartý bolyp tabylady. Karta shetelde turatyn etnıkalyq qazaqtarǵa azamattyǵyn saqtaı otyryp beriledi.
«Ata joly» kartasynyń ıegerleri elge kirgen kezde 10 jyl merzimge turýǵa ruqsat alady jáne eńbek qyzmetin júzege asyrý nemese bıznes júrgizý úshin qonystaný óńirin derbes tańdaıdy.
«Ata joly» kartasy bar etnıkalyq qazaq basqa eldiń azamaty bola otyryp, Qazaqstan azamattarymen jáne qandastarmen teń quqyqtarǵa ıe bolady, bul onyń qandastan erekshelegi.
«Ata joly» kartasynyń ıegerleri (jáne olardyń otbasy músheleri) mynadaı quqytarǵa ıe:
- medısınalyq kómektiń kepildik berilgen kólemi sheńberinde medısınalyq mekemelerde áleýmettik tólemder alý jáne qyzmet kórsetý;
- QR Eńbek kodeksine jáne «Halyqtyń kóshi-qony týraly» QR Zańyna sáıkes Qazaqstan aýmaǵynda jumysqa ornalasý;
- QR Kásipkerlik kodeksine jáne ózge de quqyqtyq aktilerine sáıkes Qazaqstan aýmaǵynda kásipkerlik qyzmetti júzege asyrý;
- «Bilim týraly» QR zańyna sáıkes memlekettik bilim berý uıymdarynda tegin orta bilim alý, memlekettik orta arnaýly jáne/nemese joǵary oqý oryndarynda konkýrstyq negizde tegin orta arnaýly jáne/nemese joǵary bilim alý, jeke oqý oryndarynda aqyly bilim alý;
- «Advokattyq qyzmet jáne zań kómegi týraly» QR zańyna sáıkes memleket kepildik bergen zań kómegin alý;
- azamattyq salasyndaǵy halyqaralyq sharttarǵa jáne QR zańnamalyq quqyqtyq aktilerine sáıkes jeńildetilgen tártippen Qazaqstan Respýblıkasynyń azamattyǵyn alý.
«Ata joly» kartasy bar adamdardyń saılaýǵa jáne QR Parlamenti men máslıhattaryna saılanýǵa, respýblıkalyq referendýmǵa qatysýǵa quqyǵy joq jáne memlekettik qyzmetke kire almaıdy.
Eger «Ata joly» kartasynyń ıesi Qazaqstan azamattyǵyn alsa, karta jaramsyz dep tanylady.
Esterińizge sala keteıik, Memleket basshysynyń tapsyrmasy boıynsha 2023 jyldyń shildesinen bastap shetelde turatyn etnıkalyq qazaqtar úshin elge jeńil kirý/shyǵý máselesi pysyqtalǵan «Ata joly» kartasy engizildi.