Almaty Máslıhatynyń VIII shaqyrylymynyń XXVI kezekten tys sesıasynda depýtattar kóppáterli úılerdiń ortaq múlkin kútip-ustaýǵa arnalǵan eń tómengi tarıfti bekitti. Sesıa barysynda 14 jyldan astam ýaqyt qaralmaǵan tarıftik saıasatty jańartý máselesi talqylandy, dep habarlaıdy aqshamnews.kz
Kóppáterli úılerdiń ortaq múlkin kútip-ustaýǵa arnalǵan bir jyldyq eń tómengi tarıf Almatyda alǵash ret 2010 jyly ákimdik qaýlysymen bekitilip, 1 sharshy metr úshin 25 teńge bolǵan. Onyń qoldanylý merzimi 1 jylmen shektelgen bolatyn. Alaıda sodan beri qurylys materıaldarynyń qymbattaýy, qyzmetkerlerdiń jalaqysynyń ósýi jáne turǵyn úı qyzmetiniń sapasyna qoıylatyn talaptardyń artýy syndy ekonomıkalyq jaǵdaı aıtarlyqtaı ózgerdi.
Sesıa barysynda Almaty qalasynyń Komýnaldyq ınfraqurylymdy damytý basqarmasynyń basshysy Dýlat Áshkenov bıyl jumys toby kondomınıým nysanyn basqarý jáne ortaq múlikti kútip-ustaý tarıfin esepteý úshin arnaıy ádistemege sáıkes esepteýler júrgizgenin atap ótti.
Turǵyn úıdi kútip-ustaýǵa arnalǵan eń tómengi tarıftiń ulǵaıýyna baılanysty áleýmettik osal toptardy qoldaý maqsatynda Almaty qalasynyń Jumyspen qamtý jáne áleýmettik baǵdarlamalar basqarmasy máslıhat sheshiminiń jobasyn ázirledi. Qazir maquldaý kezeńinde turǵan bul joba áleýmettik osal toptarǵa jatatyn turǵyn úı ıelerine qosymsha áleýmettik kómek kórsetýdi kózdeıdi.
- Kóppáterli turǵyn úılerdi basqarýǵa arnalǵan shyǵyndardy esepteý ádistemesine engizilgen mindetti qyzmetter tizimine basqarý qyzmeti (úlesi 30%-dan aspaıdy) jáne qyzmet kórsetý qyzmeti (úlesi keminde 70%) kiredi.
- Jańa eń tómengi tarıfterdi qabyldaý men qosymsha áleýmettik qoldaý sharalaryn ázirleý azamattardyń ómir súrý jaǵdaılaryn jaqsartýǵa jáne kóppáterli úılerge kórsetiletin qyzmet sapasyn arttyrýǵa baǵyttalǵan.
Turǵyn úıdi basqarý men kútip-ustaýdyń zamanaýı standarttaryn engizý qajetti jumystardy ýaqytyly júrgizýge, úılerdiń sanıtarlyq jáne tehnıkalyq jaǵdaıyn jaqsartýǵa, sondaı-aq qarjynyń tıimdi ári ashyq paıdalanylýyn qamtamasyz etýge múmkindik beredi.