Alǵashqy 20 tonna muzdatylǵan shoshqa eti Erevanǵa eksporttaldy.
Eksporttaýshy – Soltústik Qazaqstannyń EMC Agro kompanıasy, dep habarlaıdy aqshamnews.kz
ASHM habarlaýynsha, bul kásiporyn úshin sheteldik kásipkerlermen alǵashqy yntymaqtastyq tájirıbesi boldy, sebebi buǵan deıin ónimderi tek Qazaqstanda satylyp kelgen.
«Biz sondaı-aq shoshqa etin Grýzıaǵa eksporttaý týraly kelissózder júrgizdik. Jaqyn kúnderi bul elge de alǵashqy 20 tonna et jiberiledi.
Muny Qazaqstan úshin úlken jetistik dep aıtýǵa bolady, óıtkeni biz úshin bul naryq endi ǵana ashylýda. Armenıa men Grýzıa bizden aı saıyn 400 tonna et satyp alýǵa daıyn ekenin bildirdi.
Aıta ketý kerek, bizdiń kásiporyn aı saıyn el ishinde 700-800 tonna shoshqa etin satady. Sondyqtan, eger biz osy eki baǵytpen uzaq merzimdi yntymaqtastyq ornatsaq, ónimimizdiń 50%-y shetelge jiberiledi», - deıdi kompanıa ókilderi.
Jalpy, EMC Agro álemdegi eń iri shoshqa eti tutynýshysy bolyp tabylatyn Qytaımen yntymaqtastyqty qarastyrýda. Bıylǵy jazda Qytaı et qaýymdastyǵynyń ókilderi EMC Agro ónerkásip keshenine baryp, óndiristi teksergennen keıin, jylyna 20 myń tonna shoshqa etin ımporttaýǵa qyzyǵýshylyq tanytty.
Osyǵan baılanysty kompanıa QHR-dyń Bas Keden Basqarmasynyń aýyl sharýashylyǵy ónimderin jetkizýshiler tizilimine ený jumystaryn júrgizýde.
EMC Agro – Qazaqstandaǵy et óńdeý kásiporyndarynyń kóshbasshysy. Kompanıa joǵary sapaly, ekologıalyq taza ónim óndirýge jáne ony túpkilikti tutynýshylarǵa jetkizýge baǵyttalǵan. Et kombınatynyń óndiristik qýaty jylyna 20 000 tonna et jáne táýligine 30 tonna daıyn ónim shyǵarýǵa múmkindik beredi.