Almatyda konteınerlerdiń birin alyp bara jatqan manıpýlátordyń jolyn polısıa qyzmetkerleri bógedi.
Júrgizýshi bul konteınerdi qala shetinen 140 myń teńgege aparyp berýge keliskenin aıtty, dep habarlaıdy Almaty-akshamy.kz Polisia.kz-ke silteme jasap.
«Jedel is-sharalardy júrgizý barysynda konteınerdiń jaqynda ornalasqan jeri – Almaty oblysy, Jambyl aýdany aýmaǵyndaǵy sharýa qojalyǵy ekendigi belgili boldy. Dál osy jerden, sıntetıkalyq esirtki óndiretin orynnan taǵy eki konteıner tabyldy. İshinen ıis shyǵyp turdy. Basqa jaqtan kelgen eki azamat qylmystyq óndiris jasaǵany anyqtaldy: olar mal ustaımyz degen jeleýmen konteınerlerdi jalǵa alǵan. Óz isterin jasyrý úshin tipti 6 bas iri qara maldary da bolǵan. Úsh konteınerdi tintý kezinde shyny zerthanalyq kolbalar, jalpy salmaǵy 8 tonnaǵa jýyq suıyqtyq quıylǵan 324 kanıstr, erekshe ıisi bar 70 kelige jýyq aqshyl tústi kesek zat tabyldy jáne tárkilendi», – dedi Almaty qalalyq polısıa departamenti bastyǵynyń orynbasary Dıdar Ahanov.
Atalǵan derek QR QK-niń 297-baby 3-bóligi boıynsha biryńǵaı tizilimge tirkeldi. Tárkilengen zattarǵa sot-hımıalyq saraptama taǵaıyndaldy. QR QPK-niń 201-babyna sáıkes ózge aqparattar tergeý múddesine oraı jarıalaýǵa jatpaıtynyn habarlady. QR Konstıtýsıasynyń 77-babynyń 3-tarmaǵynyń 1-tarmaqshasyna jáne QR QPK-niń 19-baby 1-bóligine sáıkes, zańdy kúshine engen sot úkimimen belgilengenge deıin árbir adam qylmystyq quqyq buzýshylyq jasaýda kinásiz dep tanylady.