Keshte sazgerdiń jıyrmaǵa tarta áni shyrqaldy
Aýylyn ańsaǵan árbir qazaqtyń saǵynyshyn jetkizip, kindiginiń qany tamǵan jerin ańsatqan «Aýylym» ánin búginde tutas el biledi. Táı-táı basqan baladan, taıaq ustaǵan qarıaǵa deıin jatqa biletin áýezdi ánniń avtoryn keshe qazaq eli eske aldy. Keshte sazgerdiń jıyrmaǵa tarta áni shyrqaldy, dep habarlaıdy Almaty-akshamy.kz Almaty.tv-ge silteme jasap.
Temirjan Bazarbaevty eske alý keshin, kúıshi Seken Turysbekov Aqjaılaý kompozısıasymen ashty. Alakól aýdany Jalǵyzaǵash aýylynan túlep ushqan sazgerdiń janashyr jaqyndary men ónerin qoldaýshylar qatysty.
«Aýylym ánin bilmeıtin adam joq. Ókinishke qaraı, ánniń avtory kim ekenin eshkim bilmegen. Sazger eleýsiz qalyp keldi. Sondyqtan áleýmettik ádildikti ornataıyn dep osy ispen aınalysqanyma bir jyl boldy. Búkil ánin jınap birinshi ret shyǵaryp otyrmyn», – dedi uıymdastyrýshy Bolatbek Qatyqbaev.
«Meni ónerge baýlyǵan kisi. Tek án emes, ol 4 sımfonıa, 20 shaqty qorǵa arnalǵan, balalarǵa arnalǵan sıkl, 200-ge tarta án jınaǵyn Semeıde biz shyǵardyq», – dedi Shákárim atyndaǵy Semeı memlekettik ýnıversıtetiniń profesory Aımuhambet Beısenbekov.
Aıtýly keshte óner juldyzdarynan bólek, birtaýar kompozıtordyń jaqyndary men shákirtteri kelip, qundy kúıtabaqty jaryqqa shyǵardy. Kózi tirisinde jazǵan ánderiniń de jańa óńdelgen nusqasy keshte shyrqaldy.
«Shámshi Qaldaıaqov atamyzben birge konservatorıaǵa túsken, bir grýppada oqyǵan eken. Temirjan Bazarbaev Shámshi atamyzdyń alǵashqy 4 ániniń notasyn jazyp bergen. Shámshi atamyz oqýdan shyǵyp ketkennen keıin bul kisi de Semeı óńirine ketip qalady. Sol jaqta qalyp qoıyp, ekeýiniń arasyndaǵy shyǵarmashylyq baılanys úziledi», – degen jýrnalıs, radıojúrgizýshi Gúlmıra Nálibaı
Váls koróli Shámshi Qaldaıaqovpen úzeńgiles bolǵan daryndy tulǵa sol dáýirdegi mýzyka mádenıetine jańa lep bergen óner maıtalmandarynyń kóshin bastaǵan. Al onyń jaqut jyrlarǵa úılestire jazǵan áýeni el esinde máńgi qalary sózsiz.