Búgin Qazaq ulttyq qyzdar pedagogıkalyq ýnıversıtetinde Qazaqstannyń eńbek sińirgen qaıratkeri, Bilim berý isiniń úzdigi, ánshi, kompozıtor, ómirin ónerimen órnektegen Aǵaısha Shermuhambetqyzy Isaǵulovanyń 80 jyldyq mereıtoıyn atap ótti, dep habarlaıdy aqshamnews.kz.
Aǵaısha Isaǵulova – QyzPU túlegi, ulaǵatty ustaz, talantty kompozıtor ári oryndaýshy. Onyń oryndaýyndaǵy, shyǵarǵan jáne súıemeldegen 300-ge jýyq mýzykalyq jazba Qazaq radıosy men televıdenıesiniń «Altyn qorynda» saqtalǵan. Sonymen qatar halyq arasynda keńinen taraǵan 80-ge jýyq ánniń avtory. Vengrıa, Polsha, Chehıa, Bolgarıa, Germanıa, Lıtva, Ýkraına, Belorýs, Iýgoslavıa, Túrkıa, Tájikstan, Ózbekstan jáne Reseı elderinde qazaq ónerin nasıhattap, jeke án keshterin ótkizgen. Búginde profesordyń ǵylymı-ádistemelik eńbekteri, mýzykalyq shyǵarmalary joǵary oqý oryndarynda, sondaı-aq jalpy bilim beretin mektepterde keńinen qoldanylady.
«Men bul qara shańyraqqa 1963 jyly keldim. Tórt jyl bilim alyp, keıin ınstıtýtta qaldym. Qazaq qyzdaryn aıalap, alaqanymyzǵa salyp, bilim berip, qoldap, úlken jolǵa baǵyttaǵan ustazdardyń birimin. Búgin ýnıversıtetim meni áspettep, qurmet kórsetip, 80 jyldyq mereıtoıymmen quttyqtap jatyr. Barshańyzǵa sheksiz alǵysymdy bildiremin! 80 jas – men úshin qaıtalanbas, erekshe beles. Shańyraǵymyz árdaıym bıikteı bersin! Osy qýanyshty sátti uıymdastyryp, elep-eskergen Ýnıversıtet rektory Gúlmıra Ámirhanqyzyna aıryqsha alǵysymdy aıtamyn!» - dedi QyzPU túlegi, Qazaqstannyń eńbek sińirgen qaıratkeri, bilim berý isiniń úzdigi, ánshi, kompozıtor Aǵaısha Isaǵulova.
Mereıtoılyq keshke óner jáne mádenıet salasynyń maıtalmandary, ýnıversıtet oqytýshylary men stýdentteri, profesordyń shákirtteri jáne áriptesteri qatysty.
İs-shara barysynda Aǵaısha Isaǵulovanyń pedagogıkalyq jáne shyǵarmashylyq eńbekteri týraly beınerolık kórsetildi. Sonymen qatar Basqarma Tóraǵasy-Rektory Gúlmıra Qanaı Aǵaısha Isaǵulovany mereıtoıymen quttyqtap, Qazaq ulttyq qyzdar pedagogıkalyq ýnıversıteti atynan syılyq tabystady. Túlekter ustazdaryna júrekjardy alǵystaryn bildirip, jyly lebizderin jetkizdi.
«Búgin Qazaq ulttyq qyzdar pedagogıkalyq ýnıversıtetinde úlken dúbirli toı ótýde. Ónerdegi ardaqty ustazymyz Aǵaısha Isaǵulova 80 jas mereıtoıy atalyp ótýde. Aǵaısha ustazdyń shákirtteri óte kóp, olar búginde Qazaqstannyń túkpir-túkpirinde túrli salalarda abyroıly qyzmet atqarýda. Biz ustazymyzdy shyn júrekten osy mereıli jasymen quttyqtaımyz! Anamyzdaı jaqsy kórip, qadirleımiz. Ustazymyzdyń biz sıaqty tárbıelep ósirgen shákirtteri men halyqtyń júregine jol tartqan ánderi barda, Aǵaısha ustazymyz qazaq halqynyń júreginde máńgilik saqtalmaq»,-dedi Qazaqstan Respýblıkasynyń mádenıet salasynyń úzdigi, Qarasaı aýdany, Shamalǵan aýylynyń Mádenıet úıiniń dırektory Sharbaný Qalıeva.
Aǵaısha Isaǵulovanyń bastamasymen «Aıgúl» vokaldy-aspaptar ansambli, «Shattyq jyry» ansambli, «Óner jastan» opera teatry jáne basqa da óner ujymdary quryldy. Ásirese, «Aıgúl» vokaldy-aspaptar ansambliniń dúnıege kelýi – qazaq mýzyka ónerindegi aıtýly oqıǵalardyń biri.
Mereıtoılyq is-sharaǵa arnaıy kelgen «Aıgúl» vokaldy-aspaptyq kvartetiniń múshesi Gúlnar Begalıeva óz estelikterimen bólisti.
«Men osy ýnıversıtettiń eń alǵashqy túlekteriniń birimin. Mýzykalyq fakúltetke rektordyń ózi jolymyzdy ashyp, ári qaraı osy jerde ósip-ónsin dep tórt qyzdy qaldyrdy. Ol jyldary bizge qazaq mýzykasynyń jaryq juldyzy, kompozıtor Eskendir Hasanǵalıev sabaq berdi. Bir kúni Eskendir Hasanǵalıev: «Tórteýiń nege vokaldyq kvartet qurmaısyńdar?» — dep usynys aıtty. Osylaısha, sol kisiniń ıdeıasymen kvartet quryp, sapaly repertýar daıyndaýǵa kiristik. Dál sol ýaqytta onyń «Jaǵadaǵy arý qyz» áni jańadan shyqqan edi. Bul ándi sımfonıalyq orkestrdiń súıemeldeýimen oryndap, úlken sahnaǵa alyp shyqtyq. Kóp uzamaı Máskeýde «Alo, my ıshem talanty» atty konkýrs jarıalanyp, biz de baq synaýǵa attandyq. Baıqaý qorytyndysy boıynsha laýreat atanyp, úlken jetistikpen oraldyq. Bul konkýrsta erekshe oqıǵa oryn aldy. Júrgizýshi búkil radıo men teledıdar arqyly kórermenderge: «Qazir bir án oryndalady. Eger bul án sizderge unasa, jaryqtaryńyzdy óshirińizder!» — dep habarlady. Biz ánimizdi oryndap bitkenshe, tek zaldaǵy kórermender ǵana emes, búkil Máskeý qalasy jaryǵyn sóndirip tastady. Mundaı erekshe sátke bireý sener, bireý senbes, biraq bul biz úshin umytylmas oqıǵa boldy. Aǵaısha Isaǵulovanyń qazaq mýzykasyna sińirgen eńbegi zor. Osy aıtýly kúni mereıtoıymen shyn júrekten quttyqtaı otyryp, shyǵarmashylyq jolynyń jarqyn bolýyn tileımin!» - dedi «Aıgúl» vokaldy-aspaptyq kvartetiniń múshesi Gúlnar Begalıeva.
Shara sońynda Aǵaısha Isaǵulova ýnıversıtet basshylyǵyna, sondaı-aq keshtiń qurmetti qonaqtaryna júrekjardy alǵysyn bildirip, ıgi tilekterin arnady. Óziniń ustazdyq jolyndaǵy qoldaýy men qurmetine bólengen sátterin tebirenispen eske alyp, ýnıversıtet ujymyna shyǵarmashylyq tabys pen órkendeý tiledi.