Az qamtylǵandar úshin qoldanystaǵy áleýmettik kómektiń mólsheri 0,6 AEK-ke deıin ulǵaıtyldy. Kómek halyqtyń áleýmettik osal sanattaryna jatatyn azamattardyń jekelegen 8 sanatyna kórsetiletin bolady. Bul týraly ÓKQ brıfıńinde Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov habarlady.
Mundaı sheshim «Tarıfti ınvestısıaǵa aıyrbastaý» baǵdarlamasy aıasynda 2023 jylǵy 1 qarashadan bastap elektr energıasyna tarıfterdiń kóterilýine baılanysty qalalyq máslıhat depýtattarynyń sesıasynda qabyldandy. Zańdy tulǵalar úshin elektr energıasyna tarıftiń ósýi 1 kVtsaǵ úshin 1,2% (26,44 teńgeden 26,75 teńgege deıin), jeke tulǵalar úshin 7% (21,62 teńgeden 23,13 teńgege deıin) qurady.
«Almaty qalasy boıynsha Tabıǵı monopolıalardy retteý komıteti departamentiniń derekteri boıynsha jeke tulǵalar úshin turǵyn úıge elektr energıasyn ortasha tutyný 209 kVtsaǵ quraıdy, bul turǵyn úıde qunnyń 315,59 teńgege ulǵaıýyn kózdeıdi. Osyǵan baılanysty HÁOT qosymsha áleýmettik qoldaý sharalaryn kórsetý jáne qarjylyq júktemeni azaıtý úshin qoldanystaǵy áleýmettik kómektiń mólsheri 0,6 AEK-ke, 2070 teńgege deıin ulǵaıtyldy. Áleýmettik kómek kólemin ulǵaıtý 345 teńgeni quraıdy», - dedi B.Jaýbasov.
Atap ótilgendeı, joba HÁOT qujattaryn ýchaskelik komısıaǵa jiberilmeıdi, óıtkeni áleýmettik kómek jan basyna shaqqandaǵy ortasha tabysty esepke almaı kórsetiledi. Budan basqa, 2023 jylǵy 31 jeltoqsanǵa deıin júgingen áleýmettik kómek alýshylar úshin qaıta ótinish bermeı, tólem merzimin 2024 jylǵy 30 maýsymǵa deıin uzartý kózdelgen. Áleýmettik kómek tóleýdi qala ákiminiń aýdandyq apparattary júrgizedi.
«Jobany qarjylandyrý Almaty qalasy búdjetiniń qarajaty sheńberinde júzege asyrylady. 2024 jylǵa qarjylandyrý 4 mlrd teńgeden astam sommany quraıdy», - dep tolyqtyrdy basqarma basshysy.
Habarlanǵandaı, Almatyda HÁOT qatarynan 315 myńnan astam azamat turady, onyń ishinde bıyl 559 mln teńgege 100 myńdaı adamǵa áleýmettik kómek kórsetildi.