Almatyda sportshylardyń aqshalaı qarajatyn 250 AEK-ke deıin, ıaǵnı 923 myń teńgege deıin arttyrý kózdelip otyr.
Tıisti usynysty qalalyq sport basqarmasynyń basshysy Erden Haırýllın VIII shaqyrylǵan Almaty qalasy máslıhatynyń kezekten tys XII sesıasynda depýtat Qarashash Djýzeevanyń sportshylardy aı saıyn shyǵyn tólemderiniń mólsherin arttyrý týraly suraǵyna jaýap retinde aıtty, dep habarlaıdy almaty-akshamy.kz.
«Siz ýaqtyly ári ózekti taqyrypty kóterdińiz dep oılaımyn. Biz bul máseleni sport qoǵamymen birneshe ret talqyladyq. Almaty qalasynyń sportshylaryn aı saıynǵy ustaý tólemderiniń qazirgi mólsheri 2017 jyldan beri ózgermegenin jáne elimizdiń basqa óńirlerimen salystyrǵanda birneshe ese tómen ekenin atap ótkim keledi», - dedi Erden Haırýllın.
Onyń aıtýynsha, Olımpıada, Paralımpıada jáne Sýrdlımpıada oıyndarynda 1-oryn úshin Almaty sportshylary 80 AEK mólsherinde belgilengen somany alady, al basqa óńirlerdiń sportshylaryna osyndaı jetistigi úshin keminde 2 ese joǵary tólem qarastyrylǵan. Astanada - 250 AEK, Shymkentte – 200 AEK, Qaraǵandy oblysynda – 347 AEK.
«Almatyda bul somany arttyrý sharasy ýaqytyly jáne ádil», - dedi Erden Haırýllın.