Almatyda 12 tamyz saǵat 19:00-degi jaǵdaı boıynsha 27 mm kóleminde jańbyr jaýdy, dep habarlaıdy Almaty-akshamy.kz
Bul «Qazgıdromet» RMK málimeti boıynsha bir aılyq normanyń 80%-yn quraıdy (tamyz aıynda 33 mm).Nóserletip jaýǵan qysqa merzimdi jańbyrdyń saldarynan qalanyń keıbir aýdandardyń kósheleri men aýlalaryn sý basty. Jańbyr bastalǵaly beri 52 mobıldi brıgada men 27 motopomba jumyldyryldy.
Qazirgi ýaqytta sý tasqynyn joıýǵa kúsheıtilgen rejımde 1008 jol qyzmetkeri men 640 arnaıy tehnıka jumyldyrylǵan. Bul jumystar barlyq qalalyq tótenshe jaǵdaılar qyzmetteri, TJD kúshteri men jóndeý jumystaryna aınalysatyn uıymdardy tarta otyryp júrgizilýde. Medeý aýdanynyń ákimdigi aýdandyq Tótenshe jaǵdaılar departamentimen birlesip, kóshkin qaýpi bar aımaqtarǵa tekserý júrgizdi. Topyraqtyń túsý jaǵdaılary bolǵan joq.
Aldyn ala 11 tamyzda «Qazgıdromet» RMK 12 tamyz kúni keshke jańbyr jaýatynyn eskertken bolatyn. Soǵan baılanysty kesheden beri qalanyń komýnaldyq qyzmetteri sý tasqynynyń aldyn alý jáne kedergisiz sý aǵýyn qamtamasyz etý maqsatynda 320 jumysshy men 89 birlik arnaıy tehnıka tarta otyryp, kanal jelileriniń problemalyq aımaqtaryn, arna ótkelderin jáne qoqystardy jınaýǵa arnalǵan «tuzaqtardy» tazalaý jumystary uıymdastyryldy. Sonymen qatar, 2 myńnan astam qum salynǵan qaptar daıyndaldy.
Aryq jelileri men ótkelder durys jumys istep tur, alaıda joǵary jaqtan qala ortalyǵyna keletin nóser sýynyń anomaldi kólemine baılanysty sý tasqyny jol jıegi men irgeles aýmaqtarǵa aǵyp jatyr. Biraq bul ýaqytsha qubylys. Jaǵdaı jaqyn arada turaqtalady. Barlyq zardaptar jaýyn-shashyn toqtaǵannan keıin birden joıylady.