82 kolejdiń 68 myńnan astam stýdentteri dástúrli bilim berý formatyna oralady.
«Almaty mektepteri postkovıdtik kezeńde: Bilim sapasy, balalardyń densaýlyǵy jáne otbasynyń róli» atty onlaın-forým barysynda megapolıs ákimi Baqytjan Saǵyntaev tehnıkalyq jáne kásiptik bilim berý mekemelerin damytý sharalary týraly aıtty, dep habarlaıdy Almaty-akshamy.kz.
Jańa oqý jylynda 82 kolejdiń 68 myńnan astam stýdentteri dástúrli bilim berý formatyna oralady. TjKB uıymdarynda mektepterdikine uqsas sanıtarlyq-epıdemıologıalyq qaýipsizdikti qamtamasyz etýdiń profılaktıkalyq sharalary qabyldandy, barlyq kolejder, stýdentter turatyn jataqhanalar Ashyq jobasyna qosylǵan.
Bıyl «Jas maman» jobasy aıasynda TjKB uıymdardy zamanaýı qurylǵylarmen materıaldyq-tehnıkalyq jabdyqtaý jalǵasatyn bolady.
«Eger ótken oqý jylynda 8 kolej zamanaýı qondyrǵylarmen jabdyqtalǵan bolsa, bıyl biz taǵy 10 kolejdi qamtamasyz etemiz. Ótken jylǵy jumys tájirıbesine sáıkes, jańa zerthanalar, sheberhanalar uıymdastyrylady, stýdentter bularda praktıkadan ótip, alǵan bilimderin is júzinde paıdalanatyn bolady», - dedi Baqytjan Saǵyntaev.
Qala ákimi Bilim basqarmasyna mektepterde kásiptik baǵdar berý jumysyn jaqsartýdy, bul máseleni sheshýge jumys berýshi kásiporyndardy keńinen tartýdy, kolejderdegi Quzyrettilik ortalyqtarynyń jumystaryn jandandyrýdy tapsyrdy.