Almatyda kólik quraldaryna salynatyn salyqtan túsetin túsimderdiń ósýi baıqaldy. 2025 jyly salyq 456 328 salyq tóleýshige esepteldi, bul 764 myń kólik quralyn quraıdy, dep habarlaıdy aqshamnews.kz
Esepteýlerdiń jalpy somasy 21,9 mlrd teńgeni qurady. Bul ótken jylmen salystyrǵanda 2,3 mlrd teńgege artyq. Bul týraly Almaty qalasy boıynsha Memlekettik kirister departamentiniń óndiristik emes tólemder basqarmasynyń basshysy Qanaǵat Kúlembaev óńirlik komýnıkasıalar qyzmetiniń baspasóz konferensıasynda habarlady.
«Túsimderdiń ósýi ashyqtyqtyń, azamattardyń júıege degen seniminiń ósýin, sondaı-aq almatylyqtar arasynda belsendi salyq tártibin kórsetedi», - dep basyp aıtty ol.
Sonymen qatar, onyń aıtýynsha, oń dınamıkaǵa qaramastan, kólik salyǵy boıynsha bereshek saqtalyp otyr. Búgingi tańda 60 835 azamattyń 3,9 mlrd teńge qaryzy bar, onyń 3,6 mlrd teńgesi kólik salyǵy boıynsha qaryzdar. Jekelegen azamattardyń 22 mln teńgeden astam qaryzy bar.
«Biz qaryzdy óndirip alý boıynsha belsendi jumys júrgizýdemiz: habarlamalar jiberemiz, salyq buıryqtaryn qalyptastyramyz jáne qajet bolǵan jaǵdaıda májbúrlep oryndatý sharalaryna júginemiz. Bizdiń basymdyq - salyq mindettemelerin erikti jáne ýaqtyly oryndaý», - dep habarlady Qanaǵat Kúlembaev.
Spıker azamattarǵa "e-Salyk azamat" mobıldi qosymshasy, www.kgd.kz saıttar jáne onlaın-bankıng arqyly salyqty tez jáne yńǵaıly tóleý múmkindigin eske saldy.
«Salyqty tóleý avtokóliktiń tirkelgen jeri boıynsha emes, turǵylyqty jeri boıynsha júzege asyrylatynyn este saqtaý óte mańyzdy», - dep qosty MKD ókili.
Kúlembaev sondaı-aq ardagerlerge, kóp balaly analarǵa, múgedektigi bar adamdarǵa jáne basqa da sanattaǵy azamattarǵa arnalǵan jeńildikter týraly eske saldy. Jeńildik bir kólik quralyna beriledi jáne eger menshik ıesi 2013 jyldan keıin ózgerse, qozǵaltqysh kólemi 4 myń tekshe sm-den asatyn avtomobılderge qoldanylmaıdy.