Almaty ákimi Darhan Satybaldy qalanyń kólik ınfraqurylymyn damytý máselesi boıynsha keńes ótkizdi. Jıynda LRT, metro, BRT jelileriniń qurylysy, sondaı-aq radıaldy jáne magıstraldy joldardy júrgizý jobalary qaraldy.
Qalalyq mobıldilik basqarmasynyń basshysy Saǵyndyq Telibaevtyń aıtýynsha, qazir uzyndyǵy 32,5 shaqyrym bolatyn LRT jelisiniń tehnıkalyq-ekonomıkalyq negizdemesi ázirlenip jatyr. Jobaǵa sáıkes, Alataý aýdanyndaǵy ındýstrıaldy aımaqta depo salynyp, ol «Almaty-2» temirjol vokzalyna deıin jalǵasady. Sondaı-aq Naýryzbaı aýdanyndaǵy «Barlyq» bazarymen jáne Qulja tas joly boıyndaǵy «Shyǵys» torabymen baılanys ornatylady. TEN qazan aıynda aıaqtalyp, odan keıin EPC sharty aıasynda jobalaý, qurylys jáne jabdyq satyp alý boıynsha merdiger anyqtalady.
Metro qurylysyna qatysty ákimge mynadaı málimet berildi: qazirgi jelini «Qalqaman» metro beketinen «Barlyq» bazaryna deıin uzartýǵa arnalǵan jobalyq-smetalyq qujattama daıyn. Bul ýchaskede 3 jańa beket qarastyrylǵan. Qurylysty memlekettik saraptama qorytyndysynan keıin bastaý josparlanǵan. Buǵan qosa, «Jibek Joly» metro beketinen áýejaıǵa deıingi ekinshi jeliniń tehnıkalyq-ekonomıkalyq negizdemesi ázirlenip jatyr. Ol da qazan aıynda daıyn bolady. Al úshinshi jeli «Saıran» metro beketinen Alataý qalasyna deıin sozylyp, bul baǵyt boıynsha da qujattama ázirlenýde.
«Qoǵamdyq kólikti damytý – qala úshin basty basymdyq. LRT, metro, BRT – strategıalyq jobalar. Olar sátti júzege assa, qala turǵyndarynyń qozǵalys múmkindigi artyp, ekologıa jaqsarady, demek ómir sapasy da kóteriledi. Biz jumysty jedeldetýimiz kerek. Ár kún qymbat. Sondyqtan jobalaý kezeńinen bastap paıdalanýǵa berilgenge deıin barlyq jumysty óz baqylaýyma alamyn», – dedi Darhan Satybaldy.
Keńeste Jibek Joly – Raıymbek batyr kóshelerinde salynyp jatqan BRT jelisi, «Almaty-3» temirjol vokzalynyń qurylysyna daıyndyq barysy jáne magıstraldy ári radıaldy kóshelerdi júrgizý jumystary baıandaldy. Sondaı-aq Alǵabas, Shuǵyla, Aqjar, Boraldaı, Jas-Qanat, Rahat-Mádenıet, Terekti yqsham aýdandarynda jol salý máselesi qaraldy.
Keńes qorytyndysynda Almaty ákimi barlyq jobalardyń merzimin qatań saqtaýdy, qurylys pen jobalaýda sapany qamtamasyz etýdi tapsyrdy. Ár joba boıynsha naqty merzimi men jaýapty oryndaýshylary kórsetilgen jol kartasyn ázirleý júkteldi.