Almaty qalasy Qoǵamdyq densaýlyq saqtaý basqarmasy basshysynyń m.a. Marat Pashımov medısınalyq uıymdardyń basshylarymen kezekti keńes ótkizdi.
Kezdesý barysynda MÁMS, tıisti farmasevtıkalyq tájirıbe standartynyń (GPP) engizilýi, halyqty vaksınalaýmen qamtý, psıhıatrıalyq jáne narkologıalyq qyzmetti jańǵyrtý, sondaı-aq kardıologıalyq kómekti damytý máseleleri qaraldy, dep habarlaıdy aqshamnews.kz.
Erekshe nazar tıisti farmasevtıkalyq tájirıbege aýdaryldy.
Bul Dúnıejúzilik farmasevtıkalyq federasıa (FIP) men Dúnıejúzilik densaýlyq saqtaý uıymy (DDSU) ázirlegen halyqaralyq standart.
Onda dárihananyń naýqasty qaýipsiz, tıimdi jáne utymdy dári-dármekpen qamtamasyz etýi úshin qalaı jumys isteýi kerek ekeni aıqyndalǵan.
GPP - dárihana jumysynyń «altyn standarty», ol dári-dármekti alý men farmasevtiń kásibı súıemeldeýin qamtamasyz etedi.
Marat Pashımov barlyq medısınalyq uıymǵa jyl sońyna deıin sertıfıkat alýdy tapsyrdy. Bul - medısınalyq kómektiń sapasy men birizdigin arttyrýdaǵy mańyzdy qadam.
7 aıdaǵy vaksınalaýmen qamtý deńgeıi jetkiliksiz. Eń kóp olqylyq jeke medısınalyq uıymdarda baıqalady. Bul aqparatty QDSB epıdemıologıalyq baqylaý bóliminiń basshysy Bakjanar Mýhamadıeva baıandady. QDSB basshysy m.a. tapsyrmasy boıynsha jyl sońyna deıin kórsetkishti teńestirý jáne belgilengen ındıkatorǵa qol jetkizý qajet.
Psıhıkalyq densaýlyq saqtaý qyzmetin jańǵyrtý barysy týraly Almaty qalalyq Psıhıkalyq densaýlyq ortalyǵynyń dırektory Sapar Rahmensheev baıandady. Onyń aıtýynsha, psıhıatrıalyq kómekti emhanalyq jelimen yqpaldastyrý jalǵasyp keledi: qaladaǵy 8 aýdannyń emhanalarynda alǵashqy psıhıkalyq densaýlyq ortalyqtary jumys isteıdi, onda dáriger-psıhıatr qabyldaıdy. Osylaısha, psıhıatrıalyq kómek halyq úshin anaǵurlym qoljetimdi bola tústi.
Ortalyq psıhobilim berý bastamalaryn da belsendi damytyp keledi: 2019 jyldan beri «Mentaldyq bilim berý mektebi» jumys isteıdi, jaǵdaılyq ortalyq ashyldy, úkimettik emes uıymdarmen yntymaqtastyq keńeıip keledi. Sondaı-aq eńbek arqyly ońaltý damyp jatyr: tigin sehy, baspahana jáne qorap jasaý sehy jumys isteıdi.
Qala koll-ortalyǵymen yqpaldastyrylǵan táýlik boıy jumys isteıtin «Senim telefony» (376-56-60, 8-708-983-2863) suranysqa ıe bolyp otyr: 2025 jyldyń alǵashqy alty aıynda 3 499 qońyraý tústi, bul 2024 jyldyń sáıkes kezeńimen salystyrǵanda 18 paıyzǵa kóp.
Marat Pashımov emhanalyq psıhologtardy qosymsha oqytýdy uıymdastyrýdy tapsyrdy.
Keńestiń bólek blogy kardıologıalyq qyzmettiń jumysyna arnaldy. Búginde Almatyda BSK bar naýqastarǵa 13 stasıonar kómek kórsetedi, sonyń ishinde jedel koronarlyq sındrom kezinde shuǵyl kómek kórsetetin jeti ortalyq bar.
Alty aıda qan aınalym júıesi aýrýlaryn anyqtaýǵa 104 myńnan astam adam skrınıngten ótti. Olardyń 90 paıyzdan astamy dıspanserlik esepke alyndy, bul ótken jyldyń kórsetkishinen 14,7 %-ǵa joǵary.
Sozylmaly júrek jetkiliksizdigi bar naýqastarmen jumysta da oń dınamıka baıqalady. Júrek jetkiliksizdiginiń erte túrin dıagnostıkalaý jaqsaryp, aýyr túrler sany azaıdy. Alǵash ret 1138 adamǵa dıagnoz qoıyldy, zerthanalyq jáne aspaptyq dıagnostıkamen qamtý artty. Kardıoverter-defıbrıllátor ornatý sany úsh ese ósip, ómirge qaýipti arıtmıadan bolatyn ólim-jitimdi tómendetýge yqpal etti.
Keńes sońynda Marat Pashımov kóterilgen barlyq másele qalanyń densaýlyq saqtaý júıesi úshin basym baǵyt bolyp qala beretinin atap ótti. Ol belgilengen ındıkatorlarǵa ýaqtyly qol jetkizýdiń jáne Almatydaǵy medısınalyq kómekti keshendi jańǵyrtýdy jalǵastyrýdyń mańyzyn erekshe aıtty.