Almatyda №7 qalalyq klınıkalyq aýrýhana ǵımaratynyń qaıta jańǵyrtý jumystary bastalady. Aldaǵy kúnderi merdiger uıym ǵımarat aýmaǵy boıymen qorshaý ornatady. Qala ákimdiginde habarlaǵandaı, barlyq jumystar medısınalyq qyzmettiń kólemin qysqartpaı júrgiziledi.
Qurylys basqarmasynda habarlaǵandaı, alǵashqy kezeńde 11 bloktyń 5-in qaıta jańartý josparlanǵan. Bul jumystardyń normatıvtik merzimi – 20 aı. Aýrýhananyń úzdiksiz jumysyn qamtamasyz etý úshin jóndeý kezeńinde ota jasaý bólimi men jansaqtaý zaly ýaqytsha kóshiriledi, mekemeniń shtattyq quramy ózgermeıdi.
Qaıta jańǵyrtý qajettiligi ınjenerlik jelilerdiń 90%-ǵa, kótergish konstrýksıalardyń 60%-ǵa, qasbetterdiń 70%-ǵa tozýymen baılanysty. Sondaı-aq órt qaýipsizdigi, jeldetý, gıdrooqshaýlaý júıeleri men jedel satylar talaptarǵa sáıkes kelmeıdi, medısınalyq jabdyqtar da eskirgen.
Joba aıasynda ǵımaratty seısmıkalyq turǵydan nyǵaıtý, ınjenerlik komýnıkasıalardy, qasbetti, jeldetý júıesin, transformatorlyq qosalqylardy aýystyrý, qazandyq ornatý kózdelgen. Sonymen birge aýrýhananyń paıdaly aýmaǵy 2,5 myń sharshy metrge ulǵaıyp, bólimsheler fýnksıonaldy túrde qaıta bólinedi jáne zamanaýı medısınalyq qurylǵylarmen jabdyqtalady.
«Qazirgi tańda bólimder ár blok pen qabatqa shashyrap ornalasqan, bul logıstıkany qıyndatady. Jobaǵa sáıkes birinshi qabat aýrýhananyń front-ofısine aınalyp, ákimshilik pen ambýlatorıalyq onkogematologıa bólimshesine bólek kireberister qarastyrylady. Sondaı-aq birinshi qabatta kútý aımaǵy, tirkeý orny men klınıkalyq-dıagnostıkalyq ortalyq ornalasady. Al qoımalar, arhıv jáne basqa da qosalqy bólmeler sokolge kóshiriledi. Osylaısha naýqastar men qyzmetkerler aǵyny qıylyspaı, pasıentter men dárigerler úshin qolaıly ári túsinikti orta qalyptasady. Qurylys jumystaryna baılanysty ýaqytsha qolaısyzdyqtarǵa qala turǵyndarynyń túsinistikpen qaraýyn suraımyz», – dep atap ótti Qurylys basqarmasy.