Almatydaǵy Klochkov kóshesiniń bóliginde 1978 jylǵy qubyrdy aýystyrýǵa baılanysty kólik qozǵalysy ýaqytsha shektelmek
Aldaǵy jylý maýsymyna daıyndyq aıasynda Almaty qalasynyń Almaly aýdanynda 1978 jyly paıdalanýǵa berilgen 172 metrge jýyq jylý magıstrali aýystyrylady.
Osyǵan baılanysty 2025 jyldyń 16 shildesi men 1 tamyzy aralyǵynda Almaty qalasynyń Almaly aýdanynda Klochkov kóshesiniń boıymen Qarasaı batyr kóshesinen Qabanbaı batyr kóshesine deıingi aýmaqta avtokólikter úshin qozǵalys jabylady. Eki baǵytta da kólik qozǵalysy shektelmek.
Shekteý atalǵan kóshe ýchaskesiniń kólik joly bóliginiń astynan ótetin qubyr ýchaskesinde josparlanǵan jańartý jumystarynyń qaýipsizdigin qamtamasyz etý maqsatynda engizilmek. Jańartý jumystary júrgiziletin kezeńde tutynýshylardy ystyq sýmen qamtamasyz etý saqtalady.
Bul jylý magıstrali 3 kóppáterli turǵyn úıdiń turǵyndaryn jylý energıasymen jáne ystyq sýmen qamtamasyz etedi.
Bıyl qalada barlyǵy 39 shaqyrym jylý magıstralin qaıta jańartý josparlanǵan. Bul jylý jelisiniń eskirýin 54%-ǵa deıin tómendetedi.
Esterińizge sala keteıik, qozǵalysty shekteýge qatysty barlyq aqparat Almaty.kz saıtynda, @AlmatyJoly Telegram-arnasynda, aýdan ákimdikteri men basqarmalarynyń áleýmettik jelilerinde, sondaı-aq «2GIS» jáne «Iandeks kartalary» servısterinde jarıalanǵan.