Bıyl 7 naýryzda Almaty áýejaıynyń qyzmetkerin kepilge alǵan Mashrapbek Baratovqa qatysty is boıynsha sot otyrysy qaıta jalǵasty, - dep habarlaıdy aqshamnews.kz tilshisi Massaget.kz-ke silteme jasap.
Sot otyrysy barysynda prokýror Almas Bertaev aıyptaý aktisin oqydy. Baratovqa Qylmystyq kodekstiń 293-baby 3-bóligi ("Buzaqylyq"), 261-baby 4-bóligi 2-tarmaǵy ("Kepilge alý") jáne 273-baby ("Terorızm aktisi týraly kórineý jalǵan habarlaý") boıynsha aıyp taǵylǵan. Prokýror prosesti qysqartylǵan tártipte, ıaǵnı istiń materıaldaryn zerttemeı qaraýdy usyndy.
Aıyptalýshy Mashrapbek Baratov óz kinásin moıyndady.
Tengrinews.kz /Nıkıta Danılın©
Eske salaıyq, zeınetker Baratovqa qatysty sot 2025 jylǵy 7 sáýirde bastalǵan bolatyn. Sol otyrysta kólik áskerı prokýratýrasynyń prokýrory istegi aıǵaqtardy aıyptalýshy teriske shyǵarmaǵanyn aıtyp, sot otyrysyn qysqartylǵan tártippen ótkizýdi suraǵan edi.
Sot zalynda áýejaı qyzmetkeri men aıyptalýshy sóz sóılep, aıyptalýshy kontýzıa alǵanyn, sondaı-aq adamdy kepilge alýǵa ne ıtermelegenin aıtyp bergen. Proses barysynda aıyptalýshy buǵan deıin aıyptaýlarmen kelisken bolatyn. Biraq kenetten qandaı da bir talap qoıǵany týraly aıypqa kelispeıtinin aıtyp, is qosymsha tergeýge qaıtarylǵan edi.