Festıválde alǵash ret «Aýylǵa kitap» aksıasy ótedi
Almaty qalasynda 5 qarashada KITAP FEST KIDS 2022 dástúrli kitap festıvali ótedi. Jyldyń eń aýqymdy kitap festıvali bıylǵy Balalar jylyna oraı uıymdastyrylyp otyr, dep habarlaıdy Almaty-akshamy.kz.
Almaty qalasy ákimdiginiń qoldaýymen «BAURZHAN foundation» qory ótkizip jatqan shara 2014 jyldan beri dástúrli túrde ótkizilip keledi.
8 jyl ishinde KitapFest-te tanymal qazaqstandyq avtorlar men baspagerlerdiń qatysýymen 150-den astam kitaptyń tusaýkeseri ótken. Eń bastysy joba osy ýaqyt aralyǵynda shyǵarmashylyqqa qushtar jandar úshin aýqymdy ári biregeı alańǵa aınalyp úlgerdi.
Bıylǵy KITAP FEST KIDS festıvali Balalar jylyna arnalǵandyqtan onyń baǵdarlamasy negizinen kishkentaı oqyrmandarǵa arnalǵan. Onyń ishinde Lılıa Klaýs, Gúlnar Jandybaeva, Gúljan Sársenova, Ásel Sapaqova jáne taǵy basqa kóptegen balalar jazýshylarymen kezdesý, «Tańys bolaıyq! Batyr», «Bólisý degen – baqyt», «Batý men onyń dostarynyń shytyrman oqıǵalary» syndy jańa týyndylardyń tusaýkeseri ótedi. Shara aıasynda jazýshylar óz kitaptaryn tanystyryp, pikir almasady. Sondaı-aq kitap jármeńkesi uıymdastyrylyp, kitap dúkenderi, baspagerler jáne ınternet-dúkenderi óz ónimderin usynady. Festıvál barysynda kez kelgen kitapty 20 paıyzdyq jeńildikpen satyp alý múmkindigi qarastyrylǵan.
Eń bastysy, festıválde alǵash ret «Aýylǵa kitap» aksıasy ótedi, onda kez kelgen oqyrman óz kitabyn Qazaqstannyń aýyldyq kitaphanalaryna tapsyra alady.