Saltanatty shara Ámen Qaıdardyń memorıalyna gúl shoqtaryn qoıýdan bastaldy
28 qazanda halyqaralyq anımasıa kúni atap ótiledi. Bıyl qazaqstandyq anımasıaǵa 55 jyl toldy. Sháken Aımanov atyndaǵy «Qazaqfılm» kınostýdıasynda «Qazaqanımasıa» shyǵarmashylyq birlestiginiń (SHB) resmı ashylý saltanaty ótti, dep habarlaıdy Almaty-akshamy.kz Almaty.tv-ge silteme jasap.
1967 jyly qazaq múltıplıkasıasynyń tarıhy qoıýshy-rejısseri Ámen Qaıdardyń «Qarlyǵashtyń quıryǵy nege aıyr?» atty tuńǵysh fılminen bastaý aldy. Mereıtoılyq dataǵa oraı saltanatty sharaǵa otandyq anımasıa ardagerleri shaqyryldy. Olardyń qatarynda Tamara Muqanova, Ernst Bııseıtov, Gúlmıra Sadyqova, Galına Dýsenko, Abaı Toqshabaev, qazaq kınosynyń ańyzy Asanáli Áshimov jáne qazaq anımasıasynyń damýyna eleýli úles qosqan basqa da kóptegen otandyq mádenıet qaıratkerleri bar.
Saltanatty shara Ámen Qaıdardyń memorıalyna gúl shoqtaryn qoıýdan bastaldy.
«Birinshi kezekte, barshańyzdy osyndaı mańyzdy kúnmen, atap aıtqanda, qazaq anımasıasynyń 55 jyldyǵymen shyn júrekten quttyqtaǵym keledi. Bul merekelik mereıtoı bizdiń ortaq isimizge qajymaı, baǵa jetpes úles qosqan, qazaq anımasıasynyń ardagerleri men izbasarlaryna sheksiz alǵysymyzdy bildirgimiz keledi. Olar ondaǵan jyldar boıy tynymsyz eńbek etip, táýelsiz Qazaqstanda anımasıalyq salanyń qaıta jandanýyn armandady», - dedi «Qazaqanımasıa» SHB basshysy Jánibek Orazaly quttyqtaý sózinde.
«Qazaqanımasıa» shyǵarmashylyq birlestiginiń jumysy bastalǵaly úsh aı ishinde anımasıa salasyndaǵy álemniń jetekshi mamandarynan sheberlik synyptary ótkizildi. Olardyń qatarynda Reseı Federasıasynyń, Fransıanyń jáne basqa da kóptegen elderdiń jetekshi mamandary Konstantın Bronzıt, Mıhaıl Petrıshev, Marıa Kornılova, Edvard Kýrchevskıı, Alekseı Andreev, sondaı-aq jas qazaqstandyq mamandar Ádilbek Baıan, Ivan Ardashov jáne Marjan Júnisbek bar. Oqý baǵdarlamasy barysynda stýdentter men joba qatysýshylary sheteldik jáne qazaqstandyq mamandardyń dáristeri men praktıkalyq sabaqtaryna qatysyp, kásibı tájirıbelerin shyndady.
Búgingi tańda «Qazaqanımasıa» shyǵarmashylyq birlestigi konkýrstyq negizde respýblıkanyń iri qalalarynan málimdelgen 167 senarı ishinen úzdik 20-syn tańdap aldy. 5 mınýttyq anımasıalyq kartınalardan turatyn 20 pılottyq jobany jeltoqsan aıynyń sońyna deıin aıaqtaý josparda tur. Osy bastamalar arqasynda anımasıa salasyndaǵy jas talanttardy jumyspen qamtamasyz etý múmkindigi paıda boldy.
«Qazaqanımasıa» shyǵarmashylyq birlestiginiń resmı ashylýynda «Januıa» balalar úıiniń tárbıelenýshilerine «Muzbalaq» anımasıalyq múltfılmi kórsetildi.
«Biz múltfılmderdi ádette teledıdardan jáne ıýtýbtan kóremiz. Mysaly, Masha men aıý, Fıksıkter taǵy basqalar. Biraq maǵan qazaq múltfılmderi óte unaıdy. Búgin men «Muzbalakty» alǵash kórdimúlken áser aldym. Basqa da «Batyrlar jyry», «Aldar Kóse» sıaqty qazaq múltfılmderin súıip tamashalaımyn» - dep bólisti Dına Bolǵynbaeva.
Sonymen qatar, shara barysynda qazaq anımasıasynyń damýyna qosqan úlesi úshin ardagerler men mýltıplıkatorlardyń qazirgi býyny QR Mádenıet jáne sport mınıstrliginiń arnaıy alǵys hattarymen marapattaldy.
55 jyl ishinde eki júzge jýyq múltfılm túsirilip, otyzdan asa anımasıalyq stýdıalar ómirge keldi. 2018 jyly anımasıalyq kınostýdıalar qaýymdastyǵy qurylyp, óz kezeginde bul qaýymdastyq rýhanı-mádenı mańyzy bar kóptegen is sharalar atqaryp jatyr. Sonyń ishinde jyl saıyn uıymdastyrylatyn Halyqaralyq Amen animation film festival aıryqsha atap ótýge bolady. Aldaǵy jyly Qazaq anımasıalyq kıno óneriniń atasy Ámen Qaıdardyń týǵanyna bir ǵasyr ıaǵnı 100 jyl tolmaq. Sonyń aıǵaǵyndaı osynaý ǵasyrlyq mereıtoı qarsańynda «Qazaqanımasıa» shyǵarmashylyq birlestiginde Ulttyq kınony qoldaý memlekettik ortalyǵynyń tapsyrysymen «Ámen aǵanyń báıteregi» atty qysqametrajdy múltfılm túsirilý ústinde.
«Aıta keteıik, «Qazaqanımasıa» shyǵarmashylyq birlestiginiń kezekti bastamasy sheteldik kompanıalarda taǵylymdamadan ótý múmkindigi. Qarasha aıynyń basynda otandyq anımasıa salasyndaǵy mamandar biliktiligin arttyrý úshin Túrkıa, Fransıa, Polsha jáne Ispanıanyń beldi sheteldik stýdıalaryna barady.