Almaty qalasy bilim basqarmasynyń basshysy Lázzat Jylqybaeva Óńirlik komýnıkasıalar qyzmeti alańynda sóz sóılep, pandemıa kezinde jańa jyldyq demalysty qalaı ótkizý kerektigi jóninde usynystar berdi, dep habarlaıdy Almaty-akshamy.kz
Jańajyldyq merekeler men demalystar koronavırýs aýrýynyń órshýine ákelmeýi tıis, dep málimdedi L. Jylqybaeva. Ol almatylyqtardy vaksınalaý qarqynyn arttyrýǵa shaqyrdy.
Aıta ketsek, Almaty mektepterinde qysqy demalys 2021 jyldyń 30 jeltoqsanynan bastalyp, 2022 jyldyń 9 qańtaryna deıin jalǵasady. Mektepaldy daıarlyq synyp oqýshylary men birinshi synyp oqýshylarynda qysta qosymsha 7 kún kanıkýl bolady – 2022 jylǵy 7-13 aqpan aralyǵynda.
Kolej stýdentteri úshin 10 qańtardan bastap ár túrli ýaqytta eki aptalyq qysqy demalys qarastyrylǵan.
«Bilim berý uıymdarynda sanıtarlyq-epıdemıologıalyq qaýipsizdikti qamtamasyz etý máselesi erekshe baqylaýda. Barlyq balabaqshalar, mektepter men kolejder Ashyq jobasyna qosylǵan jáne qajetti mólsherde dezınfeksıalyq jáne antıseptıkalyq quraldarmen qamtamasyz etilgen», - dedi vedomstvo basshysy.
Lázzat Jylqybaevanyń aıtýynsha, merekeler men demalystar syrqattanýshylyqtyń jańa kezeńine ákelmeýi erekshe mańyzdy.
Baspasóz máslıhatynda sóz sóılegen Almaty qalasy bilim basqarmasynyń basshysy qazirgi ýaqytta barlyq mektepke deıingi uıymdar 20-25 baladan turatyn toptardyń 100% tolý rejıminde jumys isteıtinin, barlyq sanıtarlyq talaptar qatań saqtalatynyn habarlady. Balabaqshalardyń barlyq qyzmetkerleri medısınalyq qarsy kórsetilimderi bar qyzmetkerlerden basqa egildi (6225 adam vaksına aldy).
«Balabaqshalar jyl boıy jumys isteıtinin eskere otyryp, qysqy merekeler qarsańynda biz ata-analar arasynda balalardy baqylaý qajettiligi jáne olardyń densaýlyq jaǵdaıy týraly túsindirý jumystaryn kúsheıtemiz. Barlyq balabaqshalarda tańerteńgi súzgi jumys isteıdi, aýrý jáne JRVI belgileri bar balalar toptarǵa jiberilmeıdi», - dep tolyqtyrdy Lázzat Jylqybaeva.
Jyl basynan beri balabaqshalarda 122 bala COVID-19-ben aýyrdy. Aýrý balalar anyqtalǵan toptarda eki aptalyq karantın jarıalandy.
Lázzat Jylqybaeva mektepterdegi jaǵdaı týraly da aıtyp berdi. Ol atap ótkendeı, búginde oqýshylardyń 95%-y oflaın (287 955 adam) jáne 5%-y onlaın oqıdy. Kún saıyn qashyqtyqtan oqytý formatynda 15 155 oqýshy bilim alady.
Oqý jyly bastalǵannan beri 3869 oqýshy koronavırýspen aýyrdy, olardyń 2376-y oflaın oqydy. Naýqastar qashyqtan oqytýǵa kóshirildi.
Spıker qalanyń barlyq mektepterinde temperatýrany ólsheý, vızýaldy tekserý, jeldetý, kvarstaý, ylǵaldy jınaý rejımderin saqtaýdy qosa alǵanda, sanıtarlyq talaptardyń saqtalýyna turaqty baqylaý júzege asyrylatynyn habarlady. Mektep qyzmetkerleri de 100% vaksınalandy (19 837 adam ekpe aldy).