Budan buryn qúrylys kompanıasynyń zańsyz aǵash keskeni týraly habarlaǵanbyz.
Kompanıa basshysy ruqsat qujattaryn alǵannan keıin ǵana kesýge kiriskenin aıtty, dep habarlaıdy Almaty-akshamy.kz
Qazaq Stroy qurylys kompanıasynyń dırektory Bolat Ibragımuly Almaty qalasy Alataý aýdany, Daraboz yqsham aýdanyndaǵy turǵyn úı kesheni qurylysynyń aýmaǵyndaǵy aǵashtardy kesý jóninde málimdeme jasady.
"Biz osy qalada týyp óstik jáne bizdiń is-áreketterimiz qoǵamda jaǵymsyzdyq týdyrǵany óte ókinishti. Osy másele jóninde túsindirip ótsem deımin. 2023-jyldyń mamyr aıynda osy jer ýchaskesin satyp alǵannan keıin turǵyndarmen únemi kezdesip, kelissózder júrgizip otyrdyq. Turǵyndar birneshe máselelerdi kóterdi. Onyń ishinde, qoqys toly, jaıaý júrginshiler joly, jaryqtandyrý joq. Sonymen qatar, bul jerde júrý qaýipti boldy. Sebebi, munda belgili bir turǵylyqty jeri joq adamdar jınalyp, qańǵybas ıtterdiń úıirleri kezip júrdi. Aǵash kesilgen jerde eshqashan saıabaq bolǵan emes, tek jabaıy ósindiler bolǵan. Sondyqtan bastapqyda biz óz jobamyzda zamanaýı saıabaq salýdy qarastyrdyq", dedi Bolat Ibragımuly.
Qurylys salýshynyń aıtýynsha, saıabaqqa aǵashtar otyrǵyzylady, olardyń arasynda Qyzyl kitapqa engen aǵash túrleri de bolady. Sonymen birge, kógaldar tóselip, syrtqy jaryqtandyrý, sýarý júıeleri ornatylady jáne jaıaý júrginshiler joldary jasalady. Demalys jáne vorkaýt alańdary bar kópfýnksıonaldy sport aımaǵy jabdyqtalady.
"Jalpy aıtqanda, munda turǵyndarymyz óz otbasymen demalyp, ýaqyt ótkizetin zamanaýı saıabaq jasalady. Jumysty bastamas buryn mamandandyrylǵan kompanıa osy ýchaskedegi aǵashtardy sanap, tuqymdy zerttedi. 2979 aǵash shyqty. Onyń ishinde 182 aǵashty qaıta otyrǵyzýǵa, al 2797 aǵashty kesýge ruqsat aldyq. Munyń bárin QR zańnamasynyń talaptaryna sáıkes jasadyq jáne barlyq qajetti qujattardy aldyq. Ótemaqy zań boıynsha kesilgen 1-aǵashqa 10-aǵash otyrǵyzylý qajet. Sondyqtan, bıyl barlyǵy 27 970 aǵash otyrǵyzamyz. Eń aldymen, biz jaqyn mańdaǵy turǵyn úı keshenderiniń aýmaǵynda, sodan keıin búkil qalada otyrǵyzýdy bastaımyz", - dep tolyqtyrdy qurylys kompanıasynyń dırektory.
Qazaq Stroy aǵash túrlerin zerttep, olardy sanap, ruqsat qujattaryn alǵannan keıin ǵana kesýge kiriskenin atap ótti.
Alataý aýdanyndaǵy Daraboz yqsham aýdanynda turǵyn úı kesheniniń qurylysynan jáne saıabaqtan bólek: 1200 oryndyq memlekettik mektep, mektepke deıingi mekeme, zeınetkerlerge arnalǵan demalys ortalyǵy salynady.