Soltústik Eýropanyń biraz bóliginde aıaz kúsheıdi.
Sonyń saldarynan Shvesıanyń keı aýdandarynda myńdaǵan adam elektr qýatynan ajyrap, qıyndyqqa tap bolǵan. Al tasjoldarda kólikteri otalmaı ábigerge túsken júrgizýshiler kóbeıgen, dep habarlaıdy Almaty-akshamy.kz 24.kz-ke silteme jasap.
Málimetke qaraǵanda qazir Shvesıanyń soltústigindegi synap baǵanasy 38 gradýsqa deıin tómendegen. Meteorologtar bolsa aldaǵy kúnderi budan da qatty aıaz bolatynyn eskertip otyr.
«Tańǵy saǵat 4-tiń kezinde, úıde jylý joq ekenin baıqadym. Termometr mınýs qyryq gradýsqa deıin jetken», - deıdi turǵyn Iohan Sýndkvıst.
Norvegıa astanasy Osloda da buryn-sońdy bolmaǵan aıaz bastaldy. Bul elde synap baǵanasy mınýs 37 gradýsqa jetti. Sınoptıkter muny rekordtyq kórsetkish deıdi. Kúnniń kúrt sýytýyna baılanysty, barlyq taý shańǵy kýrorttary jabylǵan.