Almatyda muqtaj jandar qonystanǵan jańa turǵyn úı kesheninen kemshilikter anyqtaldy.
Májilis depýtaty Ermurat Bapı Almatydaǵy «Mádenıet» turǵyn úı kesheniniń turǵyndarymen kezdesti, dep habarlaıdy Almaty-akshamy.kz Májilistiń baspasóz qyzmetine silteme jasap.
Úsh myńǵa jýyq adam qonystanǵan «Mádenıet» turǵyn úıiniń basym bóligin áleýmettik turǵyda muqtaj adamdar quraıdy. Kezinde Almaty ákimdiginiń sheshimimen munda tutas korpýstarǵa týǵannan kemtar bala asyrap otyrǵan otbasylar, jalǵyzbasty analar men áleýmettik qamqorlyqty qajet etetin adamdar qonystandyrylǵan.
Áleýmettik qamqorlyqty qajet etetin adamdardyń jaǵdaıyn eskergen depýtat Ermurat Bapı byltyr bul «Mádenıet» yqshamaýdanyn óziniń depýtattyq baqylaýyna alǵan bolatyn.
«Memlekettik baǵdarlamamen salynǵan bul turǵyn úı kesheniniń qurylys jumystary barysynda merdiger kompanıa «Promkomplekt» JSHS tarapynan birqatar kemshilikke jol berilgen. Bul qurylys kináraty turǵyndarǵa kóp qolaısyzdyq týǵyzyp otyr. Tipti, qurylys talaptary saqtalmaǵany bylaı tursyn, jaýyn-shashyn kezinde úılerdiń tóbesinen sý aǵatyn», – dedi Ermurat Bapı.
Osyǵan oraı depýtat turǵyndarǵa týǵyzǵan osy keleńsizdiktiń barlyǵyn eskerip, qaladaǵy Alataý aýdandyq ákimshiliginiń basshylyǵyn, jaýapty mekemeler men merdiger kompanıalardyń ókilderin shaqyrtty. Kemshilikterdi joıý máselesin turǵyndardyń tikeleı qatysýymen talqylap, bıyl oń sheshimin tabýy tıis ekenin aıtty. Múddeli mekemeler men jergilikti memlekettik organnyń basshylyǵy talap etken tapsyrmalar tolyq oryndalatynyn aıtty.