Jınalǵandar 28 gvardıalyq-panfılovshylar saıabaǵyndaǵy Máńgilik alaý men Internasıonalıs-jaýyngerlerge arnalǵan eskertkishke alqyzyl gúl shoqtaryn qoıyp, qan maıdanda erlik kórsetken, soǵystyń zardabyn tartyp, ómirden ótken jaýyngerlerdiń rýhyna taǵzym etti.
Saltanatty sharaǵa Aýǵan soǵysynyń ardagerleri men ardagerler keńesiniń ókilderi, Ulttyq ulan men Qazaqstan Respýblıkasy Qarýly Kúshteriniń áskerı qyzmetshileri, áskerı joǵary oqý oryndarynyń kýrsanttary men qala turǵyndary qatysty.
Aldymen saıabaqqa jınalǵan qaýym Aýǵan soǵysynda qaza tapqan jaýyngerlerdiń rýhyna bas ıip, olardy bir mınýttyq únsizdikpen eske aldy. Budan keıin aýǵan ardagerleri sóz alyp, soǵys aqtańdaqtary týraly estelikterimen bólisti.
- Men Aýǵanstannyń Bagram eldi-mekeninde toqtaǵan jeke barlaý batalónynda dáriger bolyp qyzmet ettim. «Shepsiz maıdan» atalyp ketken urys qımyldarynda jaraqat alǵan jaýyngerlerge medısınalyq járdem kórsetý basty mindet boldy. Solarmen qoıan-qoltyq júrip, urys ústinde qyzmetimdi atqardym. Ózimiz de jaraqat alǵan kezder boldy. Birde, avtomobılder legimen kele jatqanymyzda Salang asýynan ótkennen keıin modjahetter atqan oqtyń astynda qalyq. Júrgizýshim Aleksandr Paýtov meni kólikten shyǵyp, olarǵa qarsy oq jaýdyrdy. Sóıtip meni ajal oǵynan aman alyp qalǵan edi. Barlyq qarýlas joldastaryma jáne olardyń jaqyndaryna úlken rızashylyǵymdy bildiremin. Bul óte aýyr mindet boldy jáne biz ony asa qurmetpen oryndadyq dep, - jat eldegi joryqty jyldardy Ulttyq ulannyń otstavkadaǵy polkovnıgi Sábıt Aımaǵanbetov osylaı eske aldy.
Jıyn sońynda Almaty garnızonyna qarasty áskerı bólimder men áskerı joǵary oqý oryndarynyń kýrsanttary ardagerler aldynan saltanatty sherýmen júrip ótti.
Alqaly jıyn konserttik baǵdarlamamen aıaqtaldy, onda Aýǵan soǵysy ınternosıonalıst-jaýyngerleriniń erlikteri týraly ánder shyrqaldy.
Aman júrińizder, jaýynger aǵalar! Aýǵan soǵysynyń ardagerleri! Keýde tolǵan orden-medaldar erlik pen batyldyqtyń belgisindeı, jas urpaqqa qońyraý bolyp, syńǵyrlap tura bersin!