14 aqpanda Aýǵan soǵysy jáne tájik-aýǵan shekarasynyń ardagerleri UQK Shekara qyzmeti Almaty oblysy boıynsha departamentiniń Qarasaı aýdany shekara basqarmasyna baryp, jat eldiń shekarasynda erlikpen qaza tapqan qarýlastarynyń eskertkishine gúl shoqtaryn qoıdy. Sondaı-aq, departamenttiń shekara bólimshelerinde Aýǵan soǵysy ardagerleriniń qatysýymen jas sarbazdarǵa arnalǵan «Erlik sabaǵy» ótti.
Ótken tarıhqa úńilsek, osydan 36 jyl buryn Keńes áskeri Aýǵan jerinen shyǵaryldy. Al 2001 jyldyń 8 aqpanynda tájik-aýǵan shekarasyndaǵy qaqtyǵystar toqtap, qazaqstandyq bitimgershilik batalóny óz mısıasyn aıaqtaǵan bolatyn. Sodan beri elimizde Aýǵan soǵysynyń jáne «ystyq núktege» balanǵan tájik-aýǵan shekarasynyń ardagerlerine qurmet kórsetip, jat jerde erlikpen qaza tapqandardyń esimin máńgilik etýge arnalǵan sharalar turaqty túrde ótkizilip keledi.
Departament bastyǵy, polkovnık Serik Tóleýhanov pen «Zastava tarlandary» respýblıkalyq qoǵamdyq birlestiginiń Almaty qalalyq jáne oblystyq fılıaldarynyń ókilderi – otstavkadaǵy general-maıor Marat Majıtov bastaǵan aýǵandyq ardagerlerdi Qarasaı aýdany shekara basqarmasynyń jeke quramy saltanatty sap túzep qarsy aldy. Jıyn barysynda eskertkishke gúl shoqtary qoıylyp, jat elde qaza tapqan jaýyngerlerdi bir mınýt únsizdikpen eske alý rásimi ótti.
– Shekarashylarymyz qaıda júrse de Otanǵa adal qyzmet etýdiń úlgisin kórsetip keledi. Aýǵanstanda ınternasıonaldyq boryshyn óteý kezinde eren erlik kórsetip, qurban bolǵan shekarashy qarýlastarymyz – bizdiń júregimizde máńgi saqtalady, – dedi Aýǵan soǵysynyń ardageri Marat Álimjanuly.
Jıynnan keıin ardagerler shekara basqarmasynda uıymdastyrylǵan shaǵyn konserttik baǵdarlamany tamashalady. Zal toly kórermender aldynda serjant Dastan Sembaev pen Temirbek Júrgenov atyndaǵy Qazaq Ulttyq óner akademıasynyń stýdentteri – Ulan Asker, Quzar Qumyrolla, Ersultan Ásetuly, Aldıar Júzbaıuly jáne Jomart Rahymberdi óner kórsetti. Ásirese, shekarashy ónerpaz Dastan Sembaevtyń «Aýǵan jyry» atty Aýǵan soǵysyna 18 jasynda attanyp, týǵan jerine qara tabytpen oralǵan órimdeı jas jigitter týraly jan tebirenterlik áni zaldaǵy ár adamnyń júregine erekshe áser etti.