Búginde ońtústik astanada turatyn 2,3 mln halyqtyń 80% nemese 1,8 mln saqtandyrylǵan. Ókinishke oraı, taǵy 475 myń adam MÁMS júıesinen tys qalyp otyr. Bul týraly Óńirlik komýnıkasıalar qyzmetinde ótken baspasóz konferensıasynda Medısınalyq saqtandyrý qory Almaty qalalyq fılıaly dırektorynyń orynbasary Nurdos Qadyrbekov málimdedi.
MÁMS týraly zańǵa engizilgen ózgeristerge sáıkes, 2026 jyldan bastap jergilikti atqarý organdary halyqtyń áleýmettik jaǵdaıy tómen bóligi úshin saqtandyrý jarnasyn tóleı bastamaq. Jańa normalar arqasynda Almatyda 95 myńǵa jýyq adam MÁMS júıesindegi medısınalyq kómekke júginýge múmkindik almaq.
«Atalǵan sanat ishinen medısınalyq kómekti jıi qoldanatyn azamattar iriktelip, jergilikti búdjet esebinen saqtandyrylatyn boldy. 2026 jyly 26 myńnan astam adamnyń árqaısysy úshin aı saıyn 9189 teńgeden, jalpy 2,9 mlrd teńgeden astam qarajat jumsalmaq. Sondaı-aq, budan bylaı jumyssyz retinde resmı tirkelgender úshin de MÁMS jarnasyn jergilikti atqarý organdary tóleıdi», - dep atap ótti Nurdos Qadyrbekov.
Sonymen qatar, saqtandyrý júıesiniń qarjylyq turaqtylyǵyn qamtamasyz etý maqsatynda 2026 jyldan bastap jarna tólenetin jalaqy shegi ózgermek. Aıtap aıtsaq:
• Jumys berýshiler úshin – 40 eń tómengi jalaqy;
• Jumyskerler úshin – 20 eń tómengi jalaqy.
«Taǵy bir aıta keterligi, búgingi kúni Almaty qalasynda 1,2 mln astam, elimiz boıynsha 11,2 mln jýyq adam memleket esebinen saqtandyrylyp otyr. Bıyl memleket olar úshin aı saıyn ortasha aılyq jalaqynyń 2% aýdarady. Al, 2027 jyldan bastap jarna mólsheri birtindep ósip, 2037 jyly 4,7% deıin jetýi tıis», - dedi Nurdos Qadyrbekov.
MÁMS arqyly kórsetiletin medısınalyq kómektiń qoljetimdiligin arttyrý maqsatynda zańǵa taǵy bir jańa norma engizildi. Endi keminde 5 jyl qatarynan júıege jarna aýdaryp kelgen azamattar ýaqytsha tólem qabiletinen aıyrylǵan jaǵdaıda, saqtandyrý statýsy 6 aıǵa deıin saqtalmaq. Buǵan deıin saqtandyrý statýsy sońǵy tólem jasalǵan sátten bastap 3 aı ǵana saqtalatyn. Bul ózgeristiń ásirese, jumys kúshi jıi aýysatyn Almaty qalasy úshin mańyzy zor.
«Sońǵy jyldar ishinde biz birinshi ret saqtandyrý reformasyn tehnıkalyq emes, áleýmettik turǵydan qarastyryp otyrmyz. Engizilgen ózgerister arqasynda medısına shynymen qoljetimdi bola bastamaq. Halyqty saqtandyrý júıesimen qamtý deńgeıi jaqsaryp, medısınalyq kómekti paıdalaný múmkindigi artady», - dep atap ótti sarapshy Vácheslav Lokshın.