6 juptyń jekpe-jegi amerıkandyq ESPN telearnasynda tikeleı efırde kórsetildi
Almaty qalasynyń «Balýan Sholaq» sport saraıynda «MTK KAZAKHSTAN» menedjerlik kompanıasy uıymdastyrǵan halyqaralyq týrnır – kásibı boks keshi ótti, dep habarlaıdy Almaty-akshamy.kz.
Boks keshinde Qazaqstannan, alys-jaqyn shet elderden kelgen bokserlerdiń 16 juby baq synady. Olardyń ishinde 6 juptyń jekpe-jegi amerıkandyq ESPN telearnasynda tikeleı efırde kórsetildi.
Keshtiń basty oqıǵasy retinde qazaqstandyq boksshy Qamshybek Qońqabaev (4-0, 3 KO) WBA GOLD nusqasy boıynsha aýyr salmaqtaǵy ózine tıesili álem chempıony tıtýlyn qorǵaý úshin Ońtústik Afrıkanyń boksshysy Djonnı Múllerge (23-9-2, 14 KO) qarsy shyǵýy tıis edi. Alaıda oqý-jattyǵý barysynda afrıkalyq bylǵary qolǵap sheberiniń jaraqat alýyna baılanysty qarsylas sońǵy sátte ózgertildi.
Nátıjesinde ulttyq quramanyń burynǵy kapıtany ózbek Farrýh Djýraevpen (6-7-1, 2 KO) judyryqtasyp, ekinshi raýndta jeńiske jetti. Otandasymyz birneshe ret dál soqqy jasaǵan soń tóreshi aıqasty toqtatýǵa májbúr boldy.
Qyzylordalyq boksshy jýrnalıserge bergen suhbatynda kez-kelgen qarsylasqa daıyn bolǵanyn, ár jekpe-jektiń tájirbıe ekenin alǵa tartty.
«Eń aldymen jeńiske jetkenim úshin Qudaıǵa shúkir deımin! Qandaı da bir jekpe-jek bolmasyn barlyǵyna birdeı joǵary daıyndyqpen kelemin. Negizi basqa qarsylaspen shyǵýym tıis edi. Alaıda qysqa ýaqyt aralyǵynda úzdikterdiń qatarynda júrgen boksshylardy tabý qıyn. Eń bastysy jeńiske jetip, maǵan qoldaý bildirgen jankúıerlerdiń senimin aqtadym. Buıyrtsa bıyl 2-3 kezdesý ótkizemin. Bul týraly menedjerlerimmen jáne bapkerlerimmen aqyldasamyz», - dedi Qamshybek Qońqabaev.
Oryn alǵan ózgeristerge baılanysty kelesi kezdesý kórermenderdiń basty nazaryna ilikti. Qazaqstandyq jas boksshy Raı Seıitjanov (9-0, 6 KO) óziniń kásibı rıngtegi onynshy jekpe-jeginde 15 ret jeńiske jetip, birde-bir jeńilissiz kele jatqan meksıkalyq Hose Masıas Enrıkeske qarsy sýper jeńil salmaqta (63,5-kg) WBO Youth World tıtýly úshin kúresti. Jekpe-jek on raýndqa sozylyp, qazaqstandyq boksshyǵa ońaı bolmaǵany ábden baıqaldy.
Kórermenderge boksshylar teńbe-teń judyryqtasqandaı kóringenimen, doda 94-95, 95-94, 95-94 tóreshilerdiń bólek sheshimimen qazaqstandyqtyń jeńisimen aıaqtaldy. Túsinispeýshiliktiń ara-jigin WBC kásipqoı boksynyń tóreshisi Erbol Nuryshev ashqandaı boldy.
«Búgingi kesh óz deńgeıinde ótti, alaıda sońǵy kezdesý qıyndyq týdyrǵany ras. Meksıkalyq boksshynyń deńgeıin kórgen shyǵarsyzdar, osal emes. Aldyńǵy raýndtarda bizdiń jigit esesin jibergenimen, sońǵy raýndtarda upaılardy óz qanjyǵasyna baılady. Sheshimniń ádilettiligine kúmándanǵandar da barshylyq. Mundaı jaǵdaı kásibı boksta jıi kezdesedi. Bizdiń sportshy taıaq jep utylǵan joq, bylaı qarasyń teńbe-teń judyryqtasty desek te bolady. Alaıda jeńis quny - belbeý bolǵandyqtan, ony bireýge berý kerek boldy», - dedi tóreshi.
Ne degenmen, Raı Seıitjanov profı-rıngte onynshy jekpe-jekte jeńiske jetip, WBO tujyrymy boıynsha birinshi salmaq dárejesinde jastar arasynda álem chempıony atandy.
Sonymen qatar, qazaqstandyq kásipqoı boksshy Talǵat Shaıkın (7-0, 4 KO) jartylaı orta salmaqta (66,7-kg) synǵa túsip, ózbekstandyq boksshy Mýhammadsalım Sotvoldıevti (7-6-2, 3 KO) tóreshilerdiń biryńǵaı sheshimimen jeńdi. 8-raýndtyq jekpe-jekte Nurdos Tólebaı (8-0, 6 KO) ózbekstandyq taǵy bir ókil Býrgýt Hodjıboevti (8-3, 3 KO) tórtinshi raýndta tehnıkalyq nokaýdqa jiberdi.
Jalpy keshte joǵaryda aıtylǵan boksshylardan bólek Mıhaıl Kohanchık, Artem Pchelákov, Dastan Sadýuly, Nurbol Sultanbaı, Jarqynbek Ámirov, Vácheslav Álimbaev, Qanat Ózbekbaev, Daryn Imahanov, Qanat Sangıl, Ádilet Dámeshov baq synady.