2026 jyly «Baıqońyrdan» «Proton – M» zymyran tasymaldaǵyshyn ushyrý toqtatylady. Bul jaıynda Májilis depýtattarynyń saýalyna QR Premer-mınıstri Álıhan Smaıylovtyń jaýabynda aıtylǵan, dep habarlaıdy Almaty-akshamy.kz QazAqparatqa silteme jasap.
«Búgingi kúni zertteý nátıjeleri boıynsha alynǵan derekter zymyranǵarysh qyzmetiniń tasymaldaǵysh zymyrandardan bólinetin bólikterdiń qulaý aýdandarymen shektes aýmaqtaǵy eldi mekender turǵyndarynyń mekendeý ortasynyń jaı-kúıine jáne densaýlyǵyna tikeleı áserin rastaýdyń joq ekendigin kórsetedi. Depýtattyq saýalda sıpattalǵan patologıaǵa geptıl zymyran otynynyń qatysy joq. Óıtkeni «Proton-M» ZT bólinetin bólikteriniń paıdalanylatyn qulaý aýdandarynda eldi mekender joq. «Proton-M» ZT-nyń qulaý aýdandary Jezqazǵan qalasynan edáýir qashyqtyqta (73,3 shaqyrym) ornalasqan. Bul - «Proton» ZT qulaý aýdanyna eń jaqyn eldi meken», - dedi Úkimet basshysy jaýabynda.
Premer-mınıstrdiń dereginshe, 2014 jylǵy 24 qarashadaǵy «Baıqońyr» kesheni boıynsha Qazaqstan-Reseı úkimetaralyq komısıasynyń otyrysy aıasynda Qazaqstan Respýblıkasynyń qorshaǵan ortasyna ekologıalyq júktemeni azaıtý maqsatynda 2017 jyldan bastap zymyran otyny-geptıldi (sımmetrıaly emes dımetılgıdrazın, NDMG) paıdalanatyn «Proton – M» ZT ushyrylymdaryn (2017 jyly 2-ge, 2020 jyly taǵy 2-ge, 2025 jyly 5-ke deıin jetkizý) qysqartý jáne ushyrylymdardy 2026 jyly tolyq aıaqtaý kózdelgen.
«Sonymen birge, Baıqońyr ǵarysh aılaǵy qyzmetiniń áseri turǵysynan Qaraǵandy oblysynyń Jezqazǵan-Ulytaý óńirinde onkologıalyq aýrýlardyń ósý sebepterin zerdeleý maqsatynda Ekologıa, geologıa jáne tabıǵı resýrstar Mınıstriniń 2022 jylǵy 4 naýryzdaǵy № 69-Ó buıryǵymen múddeli memlekettik organdarmen jáne óńirdiń jurtshylyq ókilderimen birlesip vedomstvoaralyq komısıa quryldy», - dedi Álıhan Smaıylov.