Almatyda kámeletke tolmaǵandarǵa temeki jáne temeki ónimderin zańsyz satý faktilerine qarsy kúres jalǵasýda.
Bul týraly Almaty qalalyq polısıa departamentiniń resmı ókili Saltanat Ázirbek Óńirlik komýnıkasıalar qyzmetindegi baspasóz konferensıasynda málimdedi, dep habarlaıdy aqshamnews.kz.
Onyń aıtýynsha, 2024 jyly 21 jasqa tolmaǵandarǵa temeki men temeki ónimderin satý boıynsha 160 quqyqbuzýshylyq anyqtaldy. Zańdy buzǵan kásipkerler QR Ákimshilik quqyq buzýshylyq týraly kodeksiniń 423-1-babyna sáıkes ákimshilik jaýapkershilikke tartyldy.
«Zańǵa sáıkes, 21 jasqa tolmaǵan azamattarǵa temeki ónimderin satý – quqyqbuzýshylyq bolyp tabylady. Jeke tulǵalarǵa 15 AEK, al shaǵyn kásipkerlik sýbektilerine 25 AEK mólsherinde aıyppul qarastyrylǵan», – dedi spıker.
2025 jyldyń basynan beri osyǵan uqsas 27 quqyqbuzýshylyqtyń joly kesildi. Bılik jastardy temeki ónimderiniń zıandy áserinen qorǵaý maqsatynda baqylaýdy kúsheıtýde.
Sonymen qatar, azamattardyń densaýlyǵyn qorǵaý sharalary aıasynda shylym shegýge bolmaıtyn temeki ónimderiniń, sonyń ishinde elektrondyq tutyný júıeleriniń men hosh ıistendirgishterdiń jáne olarǵa arnalǵan suıyqtyqtardyń zańsyz aınalymyna qarsy qatań sharalar qabyldanýda. Veıpterdi zańsyz satý úshin 200 AEK-ke deıin aıyppul nemese 200 saǵatqa deıin qoǵamdyq jumystarǵa tartý jazasy qarastyrylǵan.
«Memleket jastardy nıkotın ónimderiniń zıandy áserinen qorǵaý saıasatyn júıeli túrde júrgizip keledi. Zańdy buzǵany úshin jaýapkershilik edáýir kúsheıtildi, sondyqtan kásipkerlerdi belgilengen talaptardy qatań saqtaýǵa shaqyramyz», – dep atap ótti qalalyq polısıanyń ókili.