Almatyda jylý jelilerin synaý jalǵasýda.
Jylytý maýsymyna daıyndyq resýrspen qamtamasyz etetin kásiporyndardyń kestelerine sáıkes júrgizilýde. Energokeshenniń jylý berý maýsymyna jalpy daıyndyǵy, aǵymdaǵy jylǵy 9 qyrkúıektegi jaǵdaı boıynsha, 94% paıyzdy qurady. Bul týraly Óńirlik komýnıkasıalar qyzmetinde ótken brıfıńte Almaty qalalyq energetıka jáne sýmen jabdyqtaý basqarmasynyń basshysy Sanjar Alın aıtty, dep habarlaıdy Almaty-akshamy.kz.
Spıker atap ótkendeı, jylý jelileriniń daıyndyǵy 97%-dy, elektr jelileriniń daıyndyǵy 83%-dy, gaz jelileriniń daıyndyǵy 100%-dy, sýmen jabdyqtaý jelileriniń daıyndyǵy 100%-dy, sý burý jelileriniń daıyndyǵy 100%-dy, Almatyjylýjaıenergo qazandyqtarynyń daıyndyǵy 85%-dy, AlES energıa kózderiniń daıyndyǵy 74%-dy quraıdy.
«Qazirgi tańda jylytý maýsymyna bilim berý, densaýlyq saqtaý jáne kóp páterli turǵyn úılerdiń daıyndyǵy 100%-dy quraıdy, - dedi Sanjar Alın.
Almatyda «AJJE» kásipornymen 110 tonna kómir jáne 7,9 myń tonna mazýt daıyndaldy. «AlES» AQ kásipornymen 186,5 myń tonna kómir jáne 19,3 myń tonna mazýt saqtalǵan.
Qala turǵyndaryn úzdiksiz ystyq sýmen jáne jylýmen qamtamasyz etýge toqtalatyn bolsaq, basqarma Bostandyq (Ońtústik qazandyǵy (80%)) jáne Naýryzbaı («Premera» qazandyǵy (60%)) aýdandaryndaǵy 2 qazandyqty rekonstrýksıalaý jumystaryn júrgizýde, jumystar 2023 jyly aıaqtalady, bul 300 myń tutynýshyny jylýmen qamtamasyz etýge múmkindik beredi.
Sonymen qatar, qazandyqtar men jylý jelilerin qaıta jańartýdyń bes jobasy ázirlenýde. Jobalaý-smetalyq qujattama ázirleýdi 2022-2023 jyldary aıaqtaý kózdelgen (Jetisý jáne Túrksib aýdandary).
Sondaı-aq aǵymdaǵy jyldyń 8 aıynda12 km jylý jelisi qaıta jańartylyp, 6 km jeli oqshaýlandy.
Almaty qalasy Óńirlik komýnıkasıalar qyzmetiniń habarlamalary men materıaldaryn taratý kezinde ÓKQ-ǵa silteme jasaý mindetti.