Óńirlik komýnıkasıalar qyzmetiniń brıfıńinde Almaty qalasy energetıka jáne sýmen jabdyqtaý basqarmasynyń basshysy Sanjar Alın atqarylǵan jumystar týraly esep berdi, dep habarlaıdy Almaty-akshamy.kz.
Basqarma búginde 77 jobany iske asyrýda, onyń 41-i qurylys satysynda, al 36-sy jobalanýda. Sanjar Alın atap ótkendeı, megapolıs turǵyndaryn sapaly sý qubyry jáne káriz jelilerimen qamtamasyz etý úshin basqarmamen Alataý, Jetisý, Medeý, Naýryzbaı jáne Túrksib aýdandarynda 27 joba boıynsha jumystar júrgizýde. Jelilerdiń uzyndyǵy 690,2 shaqyrym. Spıker 11 joba bıyl (jelilerdiń uzyndyǵy 272,2 km), qalǵan 16 joba (jelilerdiń uzyndyǵy 418 shaqyrym) 2023-2024 jyldary aıaqtalatynyn qosyp aıtty.
«2020 jyly Naýryzbaı aýdanyndaǵy Qarǵaly, Qaraǵaıly, Quramys, Taýsamaly shaǵyn aýdandarynyń turǵyndaryn sýmen qamtamasyz etý úshin 50 myń turǵyndy sýmen qamtamasyz etetin «Qarǵaly» sý tartý qurylysy salyna bastaldy. Sondaı-aq, bıyl Aqjar, Tastybulaq, Shuǵyla, Taýsamaly shaǵyn aýdandary, Jańaturmys jáne Qyrǵaýyldy shaǵyn aýdandarynyń 100 myń turǵynyn sýmen jabdyqtaıtyn osyǵan uqsas qurylysty Aqsaı ózeninde bastaý josparlanýda», - dep habarlady S. Alın.
Sondaı-aq, basqarma sýmen jabdyqtaý jáne sý burý jelilerimen qamtamasyz etetin 25 obekt jobasyn ázirleýde.