Avtonomdy kitaphana qala turǵyndaryna kitaphanaǵa barmaı-aq kitap alyp oqýǵa múmkindik beredi.
Olardyń birnesheýi qazirdiń ózinde jaqsy jumys istep tur. Alǵashqy avtonomdy kitaphana jastar ortalyǵynda ornatylǵan. Kitap alý úshin oqyrman bıleti kerek, dep habarlaıdy aqshamnews.kz 24.kz-ke silteme jasap.
Bıletti sol jerdegi kitaphana qyzmetkerinen de rásimdep alýǵa bolady. Barlyq qyzmet tegin. Katologtan qajetti avtordy tańdaı alasyz. Avtomat ótinishti tirkep, kitapti shyǵaryp beredi. Ony keıinirek kitaphanaǵa da, qurylǵyǵa da qaıtarýǵa bolady. Qoldaný merzimi 14 kún.
Gúlmıra Asylbekqyzy, Almaty qalasynyń turǵyny:
- Mynadaı jaqsy nárse uımdastyrylyp qala boıynsha qoıylyp jatyr eken. Sony estip arnaıy kelip, ózime qajetti kitapty alǵan jaıym bar. Bul óte kitapsúıer qaýym úshin qajet.
Qajetti ádebıetti Almaty kitaphanalary saıtyna kirip te tapsyrys berýge bolady. Onyń qorynda ártúrli janrdaǵy 3 mln kitap bar. Bul qaýyrt tirlikten qoly bosamaıtyn qala turǵyndary úshin óte qolaıly. Kitap oqý mádenıetin arttyrady.
Meıram Bektenbaev, Almaty qalasy ortalyqtandyrylǵan kitaphanalar júıesiniń dırektory
- Qalada kitaphana kóp emes. Olarǵa baryp, kitap oqýǵa oqyrmannyń ýaqyty bola bermeıdi. Jalpy bul álemde bar tájirıbe. Biraq elimizde alǵashqy derbes kitaphana endi ǵana iske qosylyp otyr. Kitaptardy dezınfeksıalaý amalyn qarastyrdyq. Ol úshin tazalaǵysh zattardy satyp alýymyz kerek.
Ózine-ózi qyzmet kórsetý kitaphanalary qaladaǵy eki saýda ortalyǵynda jáne mektepte de sátti jumys istep tur. Aldaǵy ýaqytta metro stansıalarynda, halyqqa qyzmet kórsetý ortalyqtarynda jáne basqa da qoǵamdyq oryndarda 20 qurylǵy ornatylady.