Almatyda 1,5 myńnan astam moped mamandandyrylǵan aıyppul turaǵyna qoıyldy, dep habarlaıdy aqshamnews.kz.
Almaty polıseıleri mopedterdiń qatysýymen bolatyn jol-kólik oqıǵalarynyń jıilep ketýine alańdaýly. Jol qaýipsizdigin qamtamasyz etý – ishki ister organdarynyń negizgi mindetteriniń biri.
"Almatyda mopedter, samokattar, skýterler keńinen paıdalanylady. Biraq, ókinishke qaraı, kóliktiń bul túrin júrgizgen kezde júrgizýshilerdiń kóbi qarapaıym jol qozǵalysy erejelerin saqtamaıdy nemese olardy elemeıdi. Osylaısha, olar joldarda apatty jaǵdaılardy týdyrady, bul kóbinese qaıǵyly saldarǵa nemese adamdardyń jaraqat alýyna ákeledi. Ótken kúngi osyndaı apattardyń biri moped tizgindegen 19 jastaǵy jasóspirimniń ólimine ákelip soqty", – dedi Almaty qalasy PD JPQB patrúldik polısıa polkiniń komandıri Oralbek Ahımov.
Spıkerdiń aıtýynsha, bıylǵy jyldyń basynan beri Almatyda mopedterdiń qatysýymen 523 jol-kólik oqıǵasy oryn alyp, nátıjesinde 535 adam jaraqat alyp, 11 adam qaza tapty. Jol qozǵalysy erejelerin buzǵany úshin 19 myńnan astam moped paıdalanýshysy ákimshilik jaýapkershilikke tartyldy. Mamandandyrylǵan aıyppul turaǵyna 1,5 myńnan astam moped qoıylǵan.
"Qurmetti júrgizýshiler, kólik quraldarynyń qaýiptiligi joǵary. Kólik júrgizý kezinde jol qozǵalysy erejeleriniń barlyq talaptaryn oryndap, abaı bolý kerek. Bul JKO-dan, jaraqat alýdan jáne ártúrli qaıǵyly saldardan aýlaq bolýǵa múmkindik beredi", – dep eskertedi Oralbek Ahımov.