Memleket basshysy “Ádiletti Qazaqstan: zań men tártip, ekonomıkalyq ósim, qoǵamdyq optımızm” atty Joldaýynda bizdiń qoǵamda eńbekqorlyq, kásibılik sıaqty qasıetter óte joǵary baǵalanýǵa tıis dep atap ótti.
Kez kelgen eńbek – qadirli. Eń bastysy, árkim jaýapkershilikti tereń sezinip, óz mindetin sapaly atqarýǵa tıis. Kásibine adal ári jaýapkershilikpen qaraǵan adam qashanda laıyqty baǵasyn alady.
Osy oraıda búgin biz Kardıologıa jáne ishki aýrýlar ǵylymı-zertteý ınstıtýtynyń anestezıologıa, reanımasıa jáne qarqyndy terapıa bólimshesinde 9 jyldan beri jumys istep kele jatqan klınıgtik qyzmetiniń mamany Aıda Núsipbaeva týraly sóz qozǵaǵymyz keledi.
Klınıkanyń kez kelgen bólimshesinde, ásirese reanımasıada sanıtardyń jumysy óte aýyr. Bul - tazartý jumystary, tósek-oryn aýystyrý, qoqys shyǵarý, túrli sharýashylyq jumystar, meıirgerlerge kómektesý ǵana emes, sonymen qatar aýyr, tósek tartyp jatqan naýqastarǵa kútim jasaý jáne t.b.
Aıda – jaýapkershiligi mol, eńbekqor, qamqor jan. Ol empatıa, janashyrlyq, adamdarǵa kómektesýge daıyn bolý, uqyptylyq, tártiptilik sıaqty qarapaıym adamı qasıetterimen erekshelenedi.
“Klınıgtik qyzmet mamandarynyń arnaıy bilimderi bolýy kerek. Aıda attestasıadan ótken, sertıfıkattalǵan maman. Ol “Medısınalyq mekemelerdegi kásibı klınıg: teorıa jáne tájirıbe” atty tıisti daıyndyqtan ótti. Aıda óte meıirimdi, jınaqy jáne pysyq. Sondyqtan da ol árdaıym abyroıly”, — deıdi ınstıtýttyń klınıngtik qyzmet bóliminiń menedjeri Gúlnar Qoılybaeva.
Keıipkerimiz bıyl Medısına qyzmetkeri kúni adal eńbegi úshin Almaty qalasy Almaly aýdany ákiminiń Qurmet gramotasymen marapattaldy.
Halyq danalyǵy: «Tazalyq – densaýlyq kepili» deıdi. Kez kelgen medısınalyq uıym sanıtarlyq-epıdemıologıalyq rejımge baǵynady. Olardyń árqaısysy pasıentter úshin ǵana emes, sonymen qatar qyzmetkerler úshin de qaýipsiz, taza ortany qamtamasyz etýi kerek. Buǵan keıipkerimiz Aıda Núsipbaevanyń da zor úlesi bar.
Taǵy bir aıta keterligi, Aıda eki balanyń aıaýly da ardaqty anasy, súıikti de súıkimdi, adal, qamqor jar, otbasynyń uıtqysy jáne berekesi.