Almaty qalasynyń Óńirlik komýnıkasıalar qyzmetiniń alańynda 2024 jyly qalanyń volonterlik qyzmetin qorytyndylaýǵa arnalǵan brıfıń ótti.
Bıyl Almaty volonterleri muqtajdarǵa kómek kórsetýden bastap qorshaǵan ortany qorǵaýǵa deıingi áleýmettik bastamalardyń keń aýqymyn qamtıtyn 800-den astam is-shara ótkizdi, dep habarlaıdy aqshamnews.kz.
Jyl ishinde volonterlik is-sharalarǵa barlyǵy 200 myńnan astam qala jastary qatysty.
Almaty qalasy Jastar saıasaty basqarmasynyń basshysy Azız Kajdenbek Almatynyń eriktileri túrli máselelerdi sheshýge belsene aralasatynyn atap ótti.
«Búginde Almatyda jalpy eriktiler sany 50 myńnan asatyn eriktilerdiń 30-dan astam iri uıymdary bar. Eriktiler múldem basqa is-sharalar ótkizedi. Biri ata-ana qamqorlyǵynsyz qalǵan balalardy oqytsa, keıbiri jalǵyzbasty zeınetkerlerge arnalǵan pansıonattarda shyǵarmashylyq keshter uıymdastyrady, al endi bireýleri janýarlarǵa nemese qorshaǵan ortaǵa kómektesedi», - dedi spıker brıfıńte.
Mysaly, ata-anasynyń qamqorlyǵynsyz qalǵan balalarǵa arnalǵan bilim berý jobalary uıymdastyryldy. Jyl basynan beri marketıń, qarjylyq saýattylyq, mobılografıa, art-jýrnalıstıka sıaqty baǵyttar boıynsha sabaqtar uıymdastyryldy. Budan basqa, eriktiler qart adamdarǵa arnalǵan shyǵarmashylyq keshter, buralqy janýarlarmen jumys jáne t.b. ótkizedi. Sondaı-aq, eriktiler kúshimen 10 myńnan astam adamdy qamtyǵan ashyq aspan astyndaǵy otandyq fılmderdiń 40-tan astam kórsetilimi uıymdastyryldy.
Sonymen qatar, qalanyń barlyq aýdandarynda «Tilder saıabaǵy» jumysyn bastady, onyń negizinde qala turǵyndary memlekettik jáne shet tilderin tegin oqydy. Kúnniń sýytqanyna qaramaı, qalanyń komýnaldyq ortalyqtary bazasynda tegin til úıretý úıirmeleri jumystaryn jalǵastyrýda.
Jumystyń mańyzdy baǵyty gýmanıtarlyq kómek boldy. Aǵymdaǵy jyly eriktiler sý tasqynynan zardap shekken aımaqtarǵa 592 tonna kómek jınap, jóneltti. Jumysty uıymdastyrýǵa 30-dan astam eriktiler uıymy, 200-den astam eriktiler jáne áskerı-ınjenerlik ınstıtýttyń 100-den astam kýrsanty qatysty.
Eriktilerdi oqytýǵa da jeke nazar aýdarylatyny belgili boldy.
«Qalanyń volonterleri men volonterlik uıymdaryna jan-jaqty qoldaý kórsetý úshin Jastar saıasaty basqarmasynyń qoldaýymen Almaty qalasy volonterleriniń óńirlik front-keńsesi jumys isteıdi. Bıyl front-keńse bazasynda túrli baǵyttar boıynsha 700-den astam trenıńter men master-klasstar ótkizildi. Jyl sońyna deıin taǵy 500 eriktini oqytý josparlanýda», - dep bólisti A.Kajdenbek.
Halyqaralyq eriktiler kúnin merekeleý aıasynda basqarma 4-8 jeltoqsan aralyǵynda Almaty qalasynyń volonterleri arasynda «Igi ister marafonyn» ótkizýdi josparlap otyr.
«Marafonnyń negizgi maqsaty - qala turǵyndary arasynda volonterlik qyzmetti nasıhattaý, jastardyń áleýmettik jaýapkershiligin arttyrýǵa járdemdesý jáne qalanyń damýyna úles qosatyn belsendi volonterlerdi kótermeleý», — dedi ÓKQ spıkeri.
Barlyǵy 10 myńnan astam adamdy qamtıtyn 20 volonterlik is-shara ótkizý josparlanýda.