Marafonnyń bastalýy Halyqaralyq eriktiler kúnine oraılastyrylǵan.
4-8 jeltoqsan aralyǵynda qalada 10 myńnan astam turǵyndy qamtıtyn 20 is-shara ótkiziledi, dep habarlaıdy aqshamnews.kz.
Bul týraly Óńirlik komýnıkasıalar qyzmetiniń alańynda Almaty qalasy eriktiler front-keńsesiniń basshysy Baǵdat Anarbaeva habarlady.
Uıymdastyrýshylardyń aıtýynsha, marafonnyń basty maqsaty - eriktilikti nasıhattaý, belsendilerdi qoldaý jáne qala turǵyndary arasynda áleýmettik jaýapkershilikti damytý.
Sonymen qatar, Baǵdat Anarbaeva 1985 jyly BUU Bas Assambleıasy 5 jeltoqsandy Halyqaralyq eriktiler kúni dep jarıalaǵanyn eske saldy, sodan beri ony búkil álem boıynsha eriktiler atap ótedi.
«Almaty qalasy, Qazaqstannyń eń iri megapolısi, eldiń ekonomıkalyq jáne mádenı ómiriniń júregi ǵana emes, sonymen qatar qýatty eriktiler qozǵalysynyń ortalyǵy. Munda álemdi jaqsy jaqqa ózgertýge umtylǵan myńdaǵan adamdardyń kúsh-jigeri biriktirilgen. Megapolıstiń baı jáne serpindi eriktiler qaýymdastyǵy az qamtylǵan otbasylarǵa kómektesýden bastap qorshaǵan ortany qorǵaýǵa deıingi túrli salalardy qamtıdy», - dep atap ótti ol.
ÓKQ spıkeri Almatynyń volonterleri jyl saıyn qoldaýǵa muqtaj jandarǵa kómektesýge nıet bildiretinin atap ótti. Búgingi tańda Almatyda jalpy eriktiler sany 50 000-nan asatyn 30-dan astam iri volonterlik uıymdar bar.
«Marafonnyń árbir jobasy — ıgi is jasaýda bastary birikken jandardyń bizdiń qoǵamymyzdyń damýyna qosqan úlesi jáne úlgisi», — dep atap ótti spıker.
Marafonnyń negizgi is-sharalarynyń qatarynda: balalar úıiniń tárbıelenýshilerin qoldaý boıynsha aksıalar, ekologıalyq sheberlik synyptaryn ótkizý, janýarlarǵa arnalǵan baspanalarǵa kómek kórsetý jáne jalǵyzbasty zeınetkerlerge arnalǵan shyǵarmashylyq keshter uıymdastyrý bar. Sondaı-aq, qalany abattandyrý chellendjderi men eriktiler arasynda donorlyq aksıa josparlanǵan.
Marafon eń belsendi qatysýshylar men eriktiler uıymdaryn marapattaý rásimimen aıaqtalady.