Almatydaǵy Arbatta polısıa qyzmetkerleri is-shara júrgizip jatyr.
Tynyshtyqty buzý derekteri boıynsha Arbatqa irgeles jatqan úılerdiń turǵyndarynyń júıeli aryzdanýynan keıin quqyq buzýshylyqty aldyn alý boıynsha profılaktıkalyq is-sharalar belsendirildi. Biraz ýaqyttan beri jaıaý júrginshiler aımaǵy azamattardyń súıikti demalys ornyna ǵana emes, moped júrgizýshileriniń de bas qosatyn ornyna aınaldy.
Al árbir jınalǵandary qoǵamdyq tártipti, azamattardyń tynyshtyǵyn buzýmen qatar júredi. Bul faktorlar jergilikti turǵyndardyń oryndy narazylyǵyn týdyryp jatady.
«Kórsetilgen aýmaqta jaıaý patrúl, al irgeles aýmaqta kólik patrúlderi kúsheıtildi. Maqsatty is-shara jumystary bastalǵaly polısıaǵa shara qoldaný úshin 39 moped júrgizýshi jetkizildi. Olar QR ÁQBtK-niń 437-baby (Tynyshtyqty buzý) jáne QR ÁQBtK-niń 615-baby (Jaıaý júrginshilerdiń jáne jol júrisine ózge de qatysýshylardyń jol júrisi qaǵıdalaryn buzýy) boıynsha jaýapkershilikke tartyldy. Eki apta ishinde Arbattan bizdiń bólimshege tártip buzǵan barlyǵy 98 moped júrgizýshi jetkizildi», – dedi Almaly aýdandyq polısıa basqarmasynyń bastyǵy Esen Ysqaqov.
Jyldyń basynan beri QR-nyń jol qozǵalysy erejelerin buzǵany úshin 4 myń 911 moped júrgizýshisi ákimshilik jaýapkershilikke tartyldy.