Almaty polısıasy zańsyz aınalymnan esirtki men qarýdyń iri partıasyn tárkileý týraly osy jyldyń qańtar aıynda habarlaǵan bolatyn.
Sol kezde 52 jastaǵy R. esimdi azamattyń páterinen esirtki qylmysyna qarsy kúres basqarmasynyń jedel qyzmetkerleri esirtki zattarynan bólek, jasyryn túsirilim men telefondy tyńdaýǵa arnalǵan arnaıy qural-jabdyqtardy da tapty.Páterden OSA travmatıkalyq tapanshasy, pnevmatıkalyq avtomat jáne sýyq qarýdyń belgileri bar 6 túrli pyshaq tabyldy, dep habarlaıdy Almaty-akshamy.kz Polisia.kz-ke silteme jasap.
«Kúdiktiniń páterin tintý kezinde eki kelige jýyq erekshe ıisi bar qońyr tústi zat, sondaı-aq dál osyndaı tuqym túrindegi zat salynǵan polıetılen baılamy tabyldy jáne tárkilendi. Boljam boıynsha, másele gashısh pen qarasora tuqymy týraly bolyp otyr. Esirtki qylmysy jáne qarý saqtaý deregi boıynsha sotqa deıingi tergeý amaldary tirkeldi. Tergeý barysynda kúdiktiniń buryn sottalǵandyǵy da eskeriletin bolady», – dep Almaty polısıasy sol kezde málimdedi.
Bostandyq aýdanynyń №2 aýdandyq soty R.esimdi azamatty QR QK-niń 287-baby 2-bóligi, QR QK-niń 296-baby 4-bóligimen kózdelgen qylmystyq quqyq buzýshylyqtardy jasaǵany úshin kináli dep tanydy. Endi ol qylmystyq-atqarý júıesiniń qaýipsizdigi ortasha mekemesinde 3 jyl jazasyn óteıdi.